કાર્યવાહી / અમદાવાદના CCTV પર ગૃહ વિભાગની બાજ નજર, છેલ્લા એક વર્ષમાં શહેરીજનો પાસેથી વસૂલાયો 31 લાખથી વધુનો દંડ

• સ્માર્ટ સિટી મિશન અંતર્ગત 1705 કેમેરા ઉપરાંત ગૃહ વિભાગના અનેક કેમેરાની બાજ નજર
• ટ્રાફિક નિયમોનો ભંગ કરવા બદલ કુલ 20.91 લાખ ઇ-મેમો ઇસ્યુ કરાયા
• ઇસ્યુ કરેલા ઇ-મેમોથી કુલ રૂ. 29.04 કરોડથી વધુ રકમનો દંડ કરાયો

ગુજરાત વિધાનસભામાં હાલ બજેટ સત્ર ચાલી રહ્યું છે. આ દરમિયાન અમદાવાદમાં કાર્યરત CCTV કેમેરાને લઈ પ્રશ્ન પૂછવામાં આવ્યો હતો. જેના જવાબમાં ગૃહ રાજ્ય મંત્રી હર્ષ સંઘવીએ જણાવ્યું હતું કે, ટ્રાફિક નિયમન માટે અમદાવાદ શહેરમાં સ્માર્ટ સિટી મિશન અંતર્ગત 1705 કેમેરા ઉપરાંત ગૃહ વિભાગ દ્વારા પણ અનેક કેમેરાઓ બાજ નજર રાખી રહ્યા છે. જેના પરિણામે રાજ્યમાં અનેક ગુનાના ડીટેક્શન અને પ્રિવેન્શનમાં મદદ મળે છે. અમદાવાદ શહેરમાં સ્માર્ટ સિટી અંતર્ગત કેટલાક કેમેરાને મરામતની જરૂર છે.  

વધ વાંચો : ગુજરાતમાં હાર્ટ એટેકે ફરી ઉથલો માર્યો: આજે વધુ 2 યુવકોના કચ્છમાં મોત, જાણો લક્ષણ-ઉપાય

ગૃહ રાજ્ય મંત્રી હર્ષ સંઘવીએ વધુમાં જણાવ્યું હતું કે, ટ્રાફિક નિયમોનો ભંગ કરવા બદલ અમદાવાદ શહેરમાં વર્ષ 2022 દરમિયાન 17.43 લાખ તેમજ વર્ષ 2023 દરમિયાન 3.48 લાખ ઇ-મેમો ઇસ્યુ કરવામાં આવ્યા છે. જે અન્વયે રાજ્ય સરકાર દ્વારા ઇસ્યુ કરેલા ઇ-મેમોથી વર્ષ 2022 માં રૂ. 25.51 કરોડથી વધુ તેમજ વર્ષ 2023 માં રૂ.3.53 કરોડથી વધુ રકમનો દંડ કરવામાં આવ્યો છે. આ ઉપરાંત અમદાવાદ જિલ્લામાં વર્ષ 2022  દરમિયાન 2,133 તેમજ વર્ષ 2023 દરમિયાન 13,293 ઇ-મેમો ઇસ્યુ કરવામાં આવ્યા છે. જે અન્વયે વર્ષ 2022 માં રૂ. 4.58 લાખથી વધુ તેમજ વર્ષ 2023માં રૂ. 31.33 લાખથી વધુ રકમનો દંડ કરાયો છે.