હોબાળો / ભારે કરી! વીરપુરમાં સમૂહ લગ્નના આયોજકો જ થયા ફરાર, વર-કન્યાના પરિવારો મૂશ્કેલીમાં મુકાયા

• વિરપુર (જલારામ )માં સમૂહ લગ્ન પહેલા જ 'શરણાઈ' બેસૂરી 
• આયોજક ફરાર, યુગલ પરિવારોનો પોલીસ મથકે હોબાળો 
• 64 યુગલ શામેલ,પ્રત્યેકે ભર્યા છે 17 હજાર,પોલીસ દાદ નથી દેતી 

રાજકોટ જીલ્લાના વીરપુર (જલારામ)માં એક સમાજ સેવી સંસ્થાના ઉપક્રમે સમૂહલગ્નનું આયોજન કરવામાં આવ્યું છે. આવિષ્કાર મહિલા વિકાસ મંડળ તરફથી યોજાનારા સમૂહલગ્નની તૈયારીભાગરૂપ  એક  બેઠકનું આયોજન કરાયું હતું. પરંતુ બેઠકમાં મુખ્ય આયોજક અનુપસ્થિત રહેતા  વર-કન્યા પક્ષના પરિવારોએ હોબાળો મચાવ્યો હતો. સમૂહ લગ્નના આયોજક કહેવાતા અનિલ સરવૈયા ગેરહાજર હતા. કહેવાય છે કે તેના વિરૂદ્ધ વીરપુર પોલીસ સ્ટેશનમાં છેડતીનો ગુનો નોંધાયો હોય તે  ફરાર છે. પરિણામે   વર-કન્યા પક્ષના પરિવારજનો મોટી સંખ્યામાં વીરપુર પોલીસ સ્ટેશને પહોચી  હોબાળો મચાવ્યો હતો.

સમૂહલગ્નનું આયોજન 6 માર્ચે 

આવિષ્કાર મહિલા વિકાસ મંડળ દ્વારા  આગામી 6 માર્ચે સમૂહલગ્નનું આયોજન કરાયું છે. આ સમૂહ લગ્નમાં  64 જેટલા યુગલ  લગ્નબંધનમાં બંધાવાના છે  આ માટે  યુગલ દીઠ  પ્રત્યેક પરિવારે 17 હજાર રૂપિયા પણ ભરી દીધા છે. પરંતુ મુખ્ય આયોજક જ ફરાર હોવાથી પરિજનોએ છેતરપિંડીનો આરોપ લગાવ્યો હતો અને  વર-કન્યા પક્ષના પરિવારો પોલીસ સ્ટેશન ફરિયાદ નોંધાવવા પહોંચ્યા હતા.  પરંતુ પોલીસે આ પરિવારજનોની  ફરિયાદ સાંભળવાની ના પાડતા મોટી સંખ્યામાં ઉપસ્થિત લોકોએ  હોબાળો મચાવ્યો હતો.