વર્લ્ડ બ્લડ ડોનર ડે / બ્લડ ડોનેટ કરવાના શું છે નિયમ, કોણ કરી શકે છે રકતદાન અને કોણ નહીં, એક ક્લિકમાં તમામ માહિતી

• આજે વર્લ્ડ બ્લડ ડોનર ડે
• લોકોને રક્તદાન કરવા માટે પ્રેરિત કરવા વર્લ્ડ બ્લડ ડોનર ડેની ઊજવણી
• આ લોકો ક્યારેય પણ ના કરી શકે રક્તદાન

રક્તદાનને મહાદાન કહેવામાં આવે છે, જેની મદદથી તમે એકસાથે અનેક લોકોનો જીવ બચાવી શકો છો. આજે વર્લ્ડ બ્લડ ડોનર ડે, દર વર્ષે 14 જૂનના રોજ રક્તદાન દિવસ ઊજવવામાં આવે છે. જેનો ઉદ્દેશ્ય લોકોને રક્તદાન કરવા માટે પ્રેરિત કરવાનો છે. શું તમને ખબર છે કે, રક્તદાન કરવાથી માત્ર લોહી મેળવનારને જ નહીં, પરંતુ રક્તદાતાને પણ અનેક ફાયદા થાય છે. 18થી 65 વર્ષ સુધીના કોઈપણ મહિલા અથવા પુરુષ રક્તદાન કરી શકે છે. પુરુષ દર 3 મહિને અને મહિલાઓ દર 4 મહિને રક્તદાન કરી શકે છે. કેટલીક પરિસ્થિતિઓમાં મહિલાઓ અથવા પુરુષ રક્તદાન કરી શકતા નથી. કોણ રક્તદાન કરી શકે અને કોણ રક્તદાન ના કરી શકે, તે અંગે અહીંયા જાણકારી આપવામાં આવી છે.

રક્તદાન કોણ કરી શકે અને કોણ ના કરી શકે?

• રક્તદાતાનું વજન 45 કિલોગ્રામથી ઓછું ના હોવું જોઈએ.
• હીમોગ્લોબિનનું લેવલ 12.5 ગ્રામથી ઓછું ના હોવું જોઈએ. 
• કેન્સરના દર્દીઓ રક્તદાન ના કરી શકે.
• જો તમે મિર્ગી, અસ્થમા, બ્લીડિંગ ડિસઓર્ડર, થેલેસીમિયા, સિકલ સેલ એનીમિયા, પોલીસિથીમિયા હોય તો તમે રક્તદાન નહીં કરી શકો. 
• છેલ્લા એક વર્ષમાં ટેટૂ અથવા એક્યુપંચર થેરાપી લીધી હોય તો, તમે રક્તદાન ના કરી શકો. 
• મહિલાઓએ પ્રસૂતિ અને બ્રેસ્ટ ફીડિંગના 1 વર્ષ પછી જ રક્તદાન કરવું જોઈએ. 
• ડાયાબિટીસમાં ઈન્સ્યુલિનના ઈન્જેક્શન લઈ રહ્યા છો, તો તમે બ્લડ ડોનેટ નહીં કરી શકો, પરંતુ ડાયાબિટીસ કંટ્રોલમાં હોય તો બ્લડ ડોનેટ કરી શકો છો. 
• નસો દ્વારા એકપણ વાર ઈન્જેક્શન લીધું હોય તો, બ્લડ ડોનેટ નહીં કરી શકો. 
• કોઈ બિમારીની દવા લેતા હોય તો બ્લડ ડોનેશન પહેલા ડૉકટરની સલાહ લેવી જરૂરી છે. 
• હેપેટાઈટિસ બી, સી, ટ્યૂબરકુલોસિસ, લેપ્રોસી અને HIV ઈન્ફેક્શન હોય તો તમે બ્લડ ડોનેટ ના કરી શકો. 
• રક્તદાનના 15 દિવસ પહેલા કોલેરા, ટાઈફોઈડ, ડિપ્થીરિયા, ટિટનેસ, પ્લેગ અને Gammaglobulinની રસી લીધી હોય તો બ્લડ ડોનેટ કરી શકતા નથી.