Lok Sabha Election 2024 : લોકસભા ચૂંટણી પહેલા ચૂંટણી કમિશનરની ખાલી જગ્યાને લઈ મોટા સમાચાર સામે આવ્યા છે. આજે PM મોદીની અધ્યક્ષતામાં મળેલી બેઠકમાં નવા ચૂંટણી કમિશનરને લઈ 2 નામો પર સર્વસંમતિ સધાઈ હોવાનો દાવો વિપક્ષ નેતા અધીર રંજન ચૌધરીએ કર્યો છે. અધીર રંજન ચૌધરીના કહ્યા મુજબ જ્ઞાનેશ કુમાર અને સુખબીર સંધુ દેશના બે નવા ચૂંટણી કમિશનર બનશે. નોંધનીય છે કે, ચૂંટણી કમિશનર અરુણ ગોયલના રાજીનામા બાદ ચૂંટણી કમિશનરની બીજી જગ્યા ખાલી પડી હતી જ્યારે એક જગ્યા પહેલાથી જ ખાલી હતી.
શું કહ્યું અધીર રંજન ચૌધરીએ ?
ચૂંટણી કમિશનરની પસંદગી માટેની સમિતિની બેઠક બાદ લોકસભામાં કોંગ્રેસના નેતા અધીર રંજન ચૌધરીએ કહ્યું કે, સમિતિમાં તેમની (સરકાર) બહુમતી છે. અગાઉ તેઓએ મને 212 નામ આપ્યા હતા પરંતુ નિમણૂકની 10 મિનિટ પહેલા તેઓએ મને ફક્ત છ નામ આપ્યા હતા. હું જાણું છું કે ચીફ જસ્ટિસ (CJI) નથી, સરકારે એવો કાયદો બનાવ્યો છે કે CJI દખલ કરી શકે નહીં અને કેન્દ્ર સરકાર પોતાની પસંદગીનું નામ પસંદ કરી શકે. હું એમ નથી કહેતો કે તે મનસ્વી છે, પરંતુ જે પ્રક્રિયાને અનુસરવામાં આવી રહી છે તેમાં કેટલીક ખામીઓ છે.
કોણ છે જ્ઞાનેશ કુમાર?
જ્ઞાનેશ કુમાર નિવૃત્ત IAS અધિકારી છે. તેઓ થોડા દિવસ પહેલા સહકાર મંત્રાલયના સચિવ પદ પરથી નિવૃત્ત થયા હતા. આ મંત્રાલયની રચના થઈ ત્યારથી જ જ્ઞાનેશે અહીં કામ કર્યું હતું. અગાઉ તેઓ ગૃહ મંત્રાલયમાં કાશ્મીર વિભાગના સંયુક્ત સચિવ હતા. તે દરમિયાન જમ્મુ-કાશ્મીરમાંથી કલમ 370 નાબૂદ કરવામાં આવી હતી. જ્ઞાનેશ 1988 બેચના કેરળ કેડરના અધિકારી છે.
વધુ વાંચો : CAA દેશભરમાં લાગુ, પરંતુ કોઇ રાજ્ય અસ્વીકાર કરે તો? ગૃહમંત્રીએ કરી સ્પષ્ટતા, જુઓ શું કહ્યું
કોણ છે સુખબીર સિંહ સંધુ ?
સુખબીર સિંહ સંધુ પણ ભૂતપૂર્વ IAS અધિકારી છે. તેઓ ઉત્તરાખંડ કેડરના 1988 બેચના અધિકારી છે. જ્યારે પુષ્કર સિંહ ધામી 2021 માં મુખ્યમંત્રી બન્યા ત્યારે સંધુને રાજ્યના મુખ્ય સચિવ તરીકે નિયુક્ત કરવામાં આવ્યા હતા.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
