- રાજસ્થાન વિધાનસભા ચૂંટણીને પગલે રાજકીય ગરમાવો
- રાજસ્થાનમાં ગુજરાત વાળી કરવાના મૂડમાં ભાજપ
- મોટા ગજાના નેતાઓની ટીકીટ કપાવાના ભણકારા
રાજસ્થાન વિધાનસભામાં વિપક્ષના નેતા ગુલાબચંદ કટારિયાને આસામના રાજ્યપાલ બનાવાયા છે જેને પગલે હવે વિધાનસભાને વિપક્ષના નવા નેતા મળશે. જે રેસમાં પૂર્વ સીએમ વસુંધરા રાજેનું નામ સૌથી આગળ હોવાનું જાણવા મળી રહ્યું છે. તો વિપક્ષના ઉપનેતા રાજેન્દ્ર રાઠોડનું નામ પણ ચર્ચામાં હોવાનું જણાઈ રહ્યું છે. સાથે સાથે દલિત નેતા તરીકે જોગેશ્વર ગર્ગ અને મદન દિલાવર,કાલીચરણ સરાફ અને નરપત સિંહ રાજવીનું પણ નામ આવી રહ્યું છે. ગુલાબચંદ કટારિયાને ફ્લોર મેનેજમેન્ટના નિપુણ માનવામાં આવી રહ્યા છે. કટારિયા રાજસ્થાનમાં અનેક વખત મંત્રી રહી ચૂક્યા છે.
રાજસ્થાનના 70 ની વધુ નેતાઓની ટીકીટ પર જોખમ
ઉલ્લેખનીય છે કે ગુજરાત વિધાનસભાની ચૂંટણીમાં ભાજપે પૂર્વ મુખ્યમંત્રી વિજય રૂપાણી સહિતના મોટા ગજાના નેતાઓની ટીકીટ આપી નવો પ્રયોગ કર્યો હતો. જેમાં ધારી સફળતા પણ મળી છે ત્યારે ભાજપ હાઈકમાન્ડે આસામના રાજ્યપાલ તરીકે ગુલાબચંદ કટારિયાની નિમણૂક કરીને ગુજરાત સમાન રાજકીય સંકેત આપી દીધો છે. જો ભાજપ રાજસ્થાનમાં ગુજરાતનો પ્રયોગ કરશે તો વસુંધરા રાજે સહિત 70 ની વધુ નેતાઓની ટીકીટ પર પણ જોખમ ઝળુંબી રહ્યું છે. જોકે, પાર્ટી હાઈકમાન્ડ વસુંધરા રાજેની અવગણના એટલી આસાનીથી કરી શકે તેમ નથી. રાજકીય નિષ્ણાતોના જણાવ્યા અનુસાર જો મોવડી મંડળ ગુજરાતના પ્રયોગનો રાજસ્થાનમાં ઉપયોગ કરે તો તેનું બેકફાયર પણ થઇ શકે છે. કારણકે રાજસ્થાન અને ગુજરાતના રાજકીય સમીકરણો અલગ જ છે, વસુંધરા રાજેનું રાજકીય કદ રૂપાણી કરતાં વધુ ગણી શકાય છે.
રાજનીતિમાં નિવૃત્તિની ઉંમર 70 વર્ષ...
મહત્વનું છે કે બીજેપી પ્રદેશ અધ્યક્ષ સતીશ પુનિયાએ રાજનીતિમાં નિવૃત્તિની ઉંમર 70 વર્ષ હોવાનું કહી રાજકીય આલમમાં નવી ચર્ચાને જોર પકડાવ્યું છે. આ નિવેદન સાથે તેમણે ચૂંટણીમાં નવું નેતૃત્વ ઊભું કરવાની વાત કરી હતી. તેણે કહ્યું કે મેં તેના પર કામ પણ શરૂ કરી દીધું છે. ભાજપ અધ્યક્ષે જયપુરમાં ટોક જર્નાલિઝમમાં વિદ્યાર્થીઓને કહ્યું હતું કે 70થી વધુ નેતાઓએ નિવૃત્તિ લેવી જોઈએ. આ ઈશારો વસુંધરા રાજે તરફ હોવાનું માનવામાં આવતું હતું. જો કે સતીશ પુનિયાએ કહ્યું કે આ તેમનો અંગત અભિપ્રાય છે. પુનિયાની આ ફોર્મ્યુલા પર કેન્દ્રએ કામ કરવાનું શરૂ કરી દીધું છે. કટારિયાને રાજ્યપાલ બનાવવાથી આવા સંકેતો મળ્યા છે. આથી પૂર્વ સીએમ વસુંધરા રાજે, પૂર્વ મંત્રી કાલીચરણ સર્રફ, વાસુદેવ દેવનાની, નરપત સિંહ રાજવીની ટિકિટ પર સંકટ આવી શકે છે.
