- AAPના ભાજપ-કોંગ્રેસ પર આકરા પ્રહાર
- કોંગ્રેસના નેતાઓ જીતીને ભાજપમાં જ જશે
- AAP એ ગુજરાતની જનતા માટે એકમાત્ર વિકલ્પ : AAP
ગુજરાત વિધાનસભાની ચુંટણી જેમ-જેમ નજીક આવી રહી છે તેમ રાજકીય ગતિવિધિઓનું જોર પણ મોટાપાયે વધી રહ્યું છે. પક્ષના અગ્રણીઓના ગુજરાત પ્રવાસમાં ઊછાળા સાથે પક્ષ પલટાની સીઝન પણ જામી છે. તેવામાં અમદાવાદ ખાતે આમ આદમી પાર્ટીના નેતા ઇસુદાન ગઢવીએ મીડિયાને સંબોધન કરતાં ભાજપ અને કોંગ્રેસને આડેહાથ લીધી હતી અને આગામી ચુંટણીમાં આમ આદમી પાર્ટીએ ગુજરાતની જનતા માટે એકમાત્ર વિકલ્પ હોવાનું જણાવ્યુ હતું.
આમ આદમી પાર્ટીના ભાજપ અને કોંગ્રેસ પર પ્રહાર
ઇસુદાન ગઢવીએ ગુજરાતની જનતાને આહ્વાન કરતા ઉમેર્યું હતું કે, કોંગ્રેસને મત આપશો તો મત બગડશે કારણ કે, કોંગ્રેસના નેતાઓ કોંગ્રેસમાંથી ટિકિટ મેળવી જીતી હાંસલ કરી લીધા બાદ ભાજપમાં જોડાઈ જશે. આથી આ વખતે દરેક સમસ્યાનો ઈલાજ આમ આદમી પાર્ટી હોવાનું ઇસુદાન ગઢવીએ જણાવ્યુ હતું. ઇસુદાને આહ્વાન કરતા ઉમેર્યું હતું કે ગુજરાતને વિકાસનો પંથ આપવો હોય તો આગામી ચુંટણીમાં આમ આદમી પાર્ટીને મજબૂત બહુમતી સાથે જીતાડશો તો તમામ કામ થઇ શકશે.
ગોવાના લોકોએ ભાજપથી ત્રાસીને કોંગ્રેસને મત આપ્યા હતા : AAP
વધુમાં મહારાષ્ટ્ર બાદ ગોવા કોંગ્રેસમાં પણ સખળડખળ શરૂ થયું છે. ગોવામાં કોંગ્રેસના ધારાસભ્યોમાં વિભાજન થવાની સંભાવના છે. આપને જણાવી દઈએ કે ગોવામાં કોંગ્રેસ પાસે 11 ધારાસભ્યો છે. જો 9 ધારાસભ્યો ભાજપમાં જોડાઈ તો કોંગ્રેસ પાસે માત્ર બે જ ધારાસભ્યો રહે તેવી સ્થિતિ છે. ગોવા વિધાનસભાના અધ્યક્ષ રમેશ તવકરે રવિવારે ઉપસભાપતિ પદ માટે ચૂંટણીની જાહેરાત કરતી સૂચનાને રદ કરી દીધી હતી. આગામી ચોમાસુ વિધાનસભા સત્ર દરમિયાન 12 જુલાઈએ મતદાન થવાનું હતું. કોંગ્રેસ ધારાસભ્યોનું એક જૂથ ભાજપમાં જોડાઈ શકે તેવી ચર્ચાઓ વચ્ચે ડેપ્યુટી સ્પીકરની ચૂંટણી માટે નોમિનેશનની નોટિસ પણ પાછી ખેંચી લેવામાં આવી છે. આ મામલે ઇસુદાને આક્ષેપ સાથે જણાવ્યુ હતું કે, ગોવામાં કોંગ્રેસના નેતાઓને ભાજપ ખરીદી રહ્યું છે. ગોવાના લોકોએ ભાજપથી ત્રાસીને કોંગ્રેસને મત આપ્યા હતા. હવે કોંગ્રેસના ધારાસભ્યો જીતીને આખરે ભાજપમાં ભળી જાય તેવી સ્થિતિ જન્મી છે આથી ગુજરાતમાં પણ કોંગ્રેસને મત આપશો તો મત બગડે તેવી સ્થિતિ ઊભી થશે.
