ક્રાઇમ / રાજકોટમાં ત્રણ ઝવેરી સાથે રૂ.૧૯.૧૭ લાખની ઠગાઈ, આરોપીઓને ઝડપી લેવા પોલીસની કવાયત

અમદાવાદઃ રાજકોટ શહેરનાં સામાકાંઠા વિસ્તારનાં ચાંદીનાં ત્રણ વેપારી પાસેથી પાયલ અને પારા મંગાવી મુંબઈનાં બે આંગડિયાથી પાર્સલ છોડાવ્યા બાદ કુલ રૂ.૧૯,૧૭,૯૩૦ નહીં ચૂકવી છેતરપિંડી કરી હતી. જે અંગે ફરિયાદ નોંધાયા બાદ પોલીસે બંને આરોપીઓને ઝડપી લેવા તપાસ હાથ ધરી છે. બનાવની વિગત અનુસાર શહેરનાં રણછોડનગરમાં શિવમ્ સિલ્વર ઓર્નામેન્ટ નામે પેઢી ધરાવતા દિલીપભાઇ ધીરજલાલ સગપરિયા (ઉ.વ.૪૬)એ બી.ડિવિઝન પોલીસ સ્ટેશનમાં નોંધાવેલી ફરિયાદમાં આરોપી તરીકે સંજય નામનો વ્યક્તિ તથા મુંબઇનાં મણિભદ્ર જવેલર્સનાં અશોકકુમારનું નામ આપ્યું છે.

ફરિયાદમાં જણાવ્યાં મુજબ મુંબઇનાં મણિભદ્ર જવેલર્સનાં નામે ચાંદીના દાગીનાનો વેપાર કરતા અશોકકુમાર અને સંજય નામનાં વ્યક્તિએ ટેલિફોનિક સંપર્ક કરી રૂ.૩,૩૧,૬૧૦ની કિંમતની ૧પ કિલો ૬૮ર ગ્રામ ચાંદીની પાયલનો ઓર્ડર આપ્યો હતો અને તે પેટે રૂ.૧.પ૦ લાખ ચૂકવી દીધાં હતાં. જેથી ફરિયાદીને વિશ્વાસ આવ્યા બાદ વધુ રૂ.૩,૩૧,૬૧૦ની પ કિલો ર૬૯ ગ્રામ પાયલનો ઓર્ડર મોકલ્યો હતો અને ઓર્ડર મુજબનો તમામ માલ આંગડિયા પેઢી મારફત મુંબઈ મોકલી આપ્યો હતો.

શરૂઆતમાં બંને શખ્સે રૂ.૧.પ૦ લાખ ચૂકવ્યા હોવાથી તેનાં પર વિશ્વાસ બેઠો હતો, પરંતુ લાખોનો માલ આંગડિયામાંથી છોડાવ્યા બાદ બંનેએ બાકીના રૂ. ૩,૧૬,૯૩૦ નહીં ચૂકવી વિશ્વાસઘાત કર્યો હતો. બાદમાં દિલીપભાઇએ અન્ય વેપારીઓને આ અંગે વાત કરતા બંને શખ્સોએ અન્ય બે વેપારી રામજીભાઇ પાસેથી રૂ.૧૦.૮૮ લાખનાં ચાંદીના પારા મગાવી તેમજ મનીષભાઈ અજાણી પાસેથી રૂ.પ.૧૩ લાખના ચાંદીના પારા મગાવી તેમની રકમ નહીં ચૂકવી વિશ્વાસઘાત કર્યો હતો. દિલીપભાઇની ફરિયાદ પરથી પોલીસે છેતરપિંડી વિશ્વાસઘાત સહિતની કલમ હેઠળ ગુનો નોંધી મુંબઈના આરોપીઓને ઝડપી લેવા તપાસ હાથ ધરી છે.