- કાંગડા વિસ્તારમાં બ્રિટિશ સમયનો ચક્કી રેલ્વે બ્રિજ તૂટી પડ્યો
- મંડીમાં એક ઘર ભૂસ્ખલનની ઝપેટમાં આવતા 7 સભ્યો કાટમાળ નીચે દટાયા, 3 મૃતદેહ મળ્યા
- ચંબા, ડેલહાઉસી, સિહુંતા અને ચૂવાડી તાલુકામાં શૈક્ષણિક સંસ્થાઓનો વહીવટ પણ એક દિવસ માટે બંધ
હિમાચલ પ્રદેશમાં અવિરત વરસાદે ભારે તબાહી મચાવી છે. કાંગડા વિસ્તારમાં બ્રિટિશ સમયનો ચક્કી રેલ્વે બ્રિજ તૂટી પડ્યો તો સાથે મંડીમાં પણ વરસાદે એક પરિવાર પર વિનાશ વેર્યો છે. મંડી જિલ્લાના ગોહર ખાતે પ્રધાનનું ઘર ભૂસ્ખલનની ઝપેટમાં આવ્યું છે અને ત્યાં સૂઈ રહેલા કુલ 7 સભ્યો કાટમાળ નીચે દટાઈ ગયા છે. અત્યાર સુધીમાં અહીંથી 3 મૃતદેહ કાઢવામાં આવ્યા છે. ભારે વરસાદને કારણે મંડી અને કુલ્લુમાં શાળાઓ અને અન્ય શૈક્ષણિક સંસ્થાઓ બંધ કરી દેવામાં આવી છે. આ સાથે ત્રણ તાલુકા ચંબા, ડેલહાઉસી, સિહુંતા અને ચૂવાડીમાં શૈક્ષણિક સંસ્થાઓનો વહીવટ પણ એક દિવસ માટે બંધ રાખવામાં આવ્યો છે.
હિમાચલ પ્રદેશના ચંબા જિલ્લામાં ભારે વરસાદને કારણે કાટમાળ દિવાલ તોડીને ઘરમાં ઘુસી ગયો હતો. જેના કારણે ત્રણ લોકો લાપતા થઈ ગયા હતા. જોકે ગ્રામીણ અને વહીવટી ટીમોએ ગુમ થયેલા પતિ, પત્ની અને પુત્રના મૃતદેહ બહાર કાઢ્યા છે. ભાટીયા વિસ્તારની બાનેટ પંચાયતના જુલાડા વોર્ડ નંબર એકમાં વરસાદે હાહાકાર મચાવ્યો છે. આ ઘટના મોડી રાત્રે બે વાગ્યે બની હતી. કાટમાળમાં દટાયેલા પતિ, પત્ની અને પુત્રના મૃતદેહોને પોસ્ટમોર્ટમ માટે સિવિલ હોસ્પિટલ ખાતે મોકલી આપવામાં આવ્યા છે.
આ તરફ મંડી જિલ્લામાં પણ વરસાદને કારણે અત્યાર સુધીમાં સૌથી વધુ વિનાશ થયો છે. અહીં કટોલામાંથી દસ વર્ષના બાળકની લાશ મળી આવી છે. ભારે વરસાદને કારણે કટોલા બજાર કાટમાળ નીચે આવી ગયું છે. માર્કેટમાં 5-6 ફૂટનો કાટમાળ પ્રવેશી ગયો છે. મંડી જિલ્લાના ધરમપુરમાં સ્થિતિ 2015 જેવી થઈ ગઈ છે. અહીં આખું બજાર અને બસ સ્ટેન્ડ કોતરની લપેટમાં આવી ગયું છે. મંડીમાં કટૌલ, ગોહર સહિત ઘણા વિસ્તારોમાં ભૂસ્ખલનને કારણે કુલ 15 લોકો લાપતા છે.
ચક્કી બ્રિજ ધરાશાઇ
હિમાચલના પઠાણકોટ સાથે કાંગડા-જોગેન્દ્રનગરને જોડતો એકમાત્ર રેલવે પુલ ક્ષતિગ્રસ્ત થયો છે. પંજાબ બાજુથી ચક્કી વિસ્તારમાં ભારે વરસાદ અને પૂરના કારણે પુલ તૂટી પડ્યો છે. આ રેલવે ટ્રેક ઐતિહાસિક છે અને લાંબા સમયથી પૂરની ઝપેટમાં હતો. જોકે જિલ્લા વહીવટીતંત્રે પહેલાથી જ આ પુલને અવરજવર માટે બંધ કર્યો હોવાથી કોઈ જાનહાનિ થઈ નથી. કાંગડાના શાહપુરની ગોરડા પંચાયતમાંથી દુઃખદ સમાચાર છે. અહીં એક કાચું મકાન ભારે વરસાદની ઝપેટમાં આવી ગયું છે અને મકાન ધરાશાઇ થતાં કાટમાળ નીચે દટાઈ જતાં બાળકનું મોત થયું છે. બાળકની ઓળખ 9 વર્ષના આયુષ તરીકે થઈ છે. પરિવારના બાકીના સભ્યોને સુરક્ષિત બહાર કાઢવામાં આવ્યા છે.
આ તરફ કુલ્લુ જિલ્લામાં પણ ગત રાત્રિથી ભારે વરસાદ પડી રહ્યો છે. ભૂસ્ખલનને કારણે અનેક જગ્યાએ વાહનવ્યવહાર બંધ થઈ ગયો છે. સેંજ ખીણના પાગલ નાળામાં ભારે પૂરનો કાટમાળ રસ્તા પર આવી ગયો છે અને ટ્રાફિકને પુનઃસ્થાપિત કરવા માટે જાહેર બાંધકામ વિભાગનું તંત્ર સ્થળ પર છે. આ સાથે ભારે વરસાદને કારણે કુલ્લુ પ્રશાસને 1 દિવસ માટે તમામ શૈક્ષણિક સંસ્થાઓ બંધ કરી દીધી છે.
