વિચિત્ર કિસ્સો / 'મારી ડ્યુટી પૂરી, હવે હું વિમાન નહીં ઉડાડું', 3 સાંસદો સહિત 100 મુસાફરો રાજકોટ એરપોર્ટ પર રઝળ્યાં

 

• રાજકોટ-દિલ્હીની ફ્લાઇટ રદ કરાઈ
• 3 સાંસદ સહિત 100 મુસાફર અટવાયા
• પાયલોટની ડ્યુટી પુરી થતા ફ્લાઇટ રદ

રાજકોટમાં એક વિચિત્ર કિસ્સો પ્રકાશમાં આવ્યો છે. રાજકોટ એરપોર્ટ પર ગઈકાલે રાત્રે પાયલોટની જીદના કારણે ત્રણ સાંસદો સહિત 100 જેટલા મુસાફરો રઝળી પડ્યા હતા. પાયલોટની જીદના કારણે ગઈકાલ રાતની રાજકોટ-દિલ્હીની ફ્લાઇટ રદ કરવામાં આવી હતી. ફ્લાઈટને રદ કરવામાં આવતા યાત્રિકો રઝળી પડ્યા હતા.

100થી વધુ યાત્રિકો જઈ રહ્યા હતા દિલ્હી
ગઈકાલે એટલે કે રવિવારે સાંજે રાજકોટ એરપોર્ટ પર દિલ્હીથી આવેલી એર ઇન્ડિયાની ફ્લાઇટ લેન્ડ થઈ હતી. દિલ્હીથી આવેલા મુસાફરો ફ્લાઇટમાંથી ઉતરી ગયા બાદ દિલ્હી જનારા મુસાફરો બેસી ગયા હતા. સાંસદ મોહનભાઈ કુંડારિયા, પૂનમબેન માડમ અને કેસરીદેવસિંહ સહિત 100થી વધુ યાત્રિકો દિલ્હી જઈ રહ્યા હતા. આ દરમિયાન એરપોર્ટ પર એક એવી ઘટના બની કે જેના કારણે આખી ફ્લાઇટ જ રદ કરી દેવી પડી. 

પાયલોટે કહ્યું- મારી ડ્યુટી પૂરી થઈ ગઈ છે 
હકીકતમાં એર ઇન્ડિયાની આ ફ્લાઇટના મુખ્ય પાયલોટે ડ્યુટી પૂરી થઈ ગઈ હોવાથી એટલે કે કામના કલાકો પૂરા થઈ ગયા હોવાથી આ ફ્લાઇટને રાજકોટથી દિલ્હી લઈ જવાની ઘસીને ના પાડી દીધી હતી. આ દરમિયાન ફ્લાઇટમાં સવાર ત્રણ સાંસદો મોહનભાઈ કુંડારિયા, પૂનમબેન માડમ અને કેસરીદેવસિંહ ઝાલાએ આ પાયલોટની સમજાવવાનો પ્રયાસ કર્યો હતો. 

પાટલોટે ફ્લાઇટ દિલ્હી લઇ જવાની ચોખ્ખી ના પાડી દીધી
તેમની સાથે જ એરપોર્ટના અધિકારીઓએ પણ પાટલોટને મનાવવાની કોશિશ કરી હતી. ત્રણ કલાક સુધી અધિકારી અને સાંસદ દ્વારા પાયલોટને માનવવાનો પ્રયાસ કરવા છતાં તેઓ ટસના મસ થયા નહોંતા. પરિણામે રાજકોટ-દિલ્હીની ફ્લાઇટ રદ કરવામાં આવી હતી.

હજુ રાજકોટ એરપોર્ટ પર પડી છે આ ફ્લાઇટ
જે બાદ સાંસદ મોહન કુંડારિયાએ દિલ્હી જવાનું કેન્સલ કર્યું હતું. જ્યારે પૂનમબેન માડમ જામનગરથી દિલ્હી ગયા હતા. જ્યાર કેસરીદેવસિંહ ઝાલા સહિત કેટલાક મુસાફરો અમદાવાદથી દિલ્હી ગયા હતા.  છેલ્લા 14 કલાકથી ફ્લાઇટ રાજકોટ એરપોર્ટ પર જ પડી છે. આ ફ્લાઇટ ક્યારે ઉડાન ભરશે તે હજી સુધી નક્કી નથી.