તકેદારી / ‘બિપોરજોય’ વાવાઝોડા પહેલા ખેડૂતો આ 8 વસ્તુઓનું રાખે ખાસ ધ્યાન, મોટી નુકસાનીથી બચી જવાશે

• બિપોરજોય વાવાઝોડાની આગાહીને પગલે ખેડૂતોને સાવચેતી રાખવા અનુરોધ
• કૃષિ પેદાશોને સુરક્ષિત જગ્યાએ મુકવા વહીવટી તંત્રની અપિલ
• પાકને તાડપત્રી કે પ્લાસ્ટિકથી યોગ્ય રીતે ઢાંકી દેવો

 હવામાન ખાતા દ્વારા રાજ્યના દેવભુમિ દ્રારકા, પોરબંદર, જામનગર, રાજકોટ, જુનાગઢ, મોરબી અને કચ્છ જિલ્લાઓમાં “બિપોરજોય વાવાઝોડા” ની આગાહી કરવામાં આવી છે. તા.12.06.2023 થી તા.16.06.2023 દરમિયાન ગુજરાતના જિલ્લાઓમાં અતિભારે પવન અને ગાજવીજ સાથે વરસાદની આગાહી કરવામાં આવી છે. આવા અતિ ભારે પવન અને વરસાદને અનુલક્ષીને ખેડૂતો પાક/કૃષિ પેદાશોના રક્ષણ માટે ઉચિત પગલાં લેતા જ હોય છે, તેમ છતાં નીચે મુજબના તકેદારીનાં પગલા લેવા પાટણ જિલ્લાના ખેડુતોને સંદેશ આપવામાં આવે છે.

• બિપરજોય વાવાઝોડાથી થતી પાક નુકશાનીથી બચવા માટે ખેડુતોના ખેત ઉત્પાદિત પાક, ખેતરમાં કાપણી કરેલ પાક ખુલ્લા હોય તો તેને તાત્કાલીક સલામત સ્થળે ખસેડવાની કાર્યવાહી કરવી.
• પ્લાસ્ટિક /તાડપત્રીથી પાકને યોગ્ય રીતે ઢાકી દેવું. અને ઢગલાની ફરતે માટીનો પાળો બનાવી વરસાદનું પાણી ઢગલાની નીચે જતું અટકાવવું.
• જંતુનાશક દવા અને ખાતરનો ઉપયોગ આ સમયગાળા પુરતો ટાળવો
• ખાતર અને બિયારણના વિક્રેતાઓએ જથ્થો પલળે નહીં તે મુજબ ગોડાઉનમાં સુરક્ષિત રાખવા.

• એ.પી.એમ.સી.માં વેપારી અને ખેડુત મિત્રોએ કાળજી રાખી આગોતરા સાવચતીના પગલા લેવા અનુરોધ કરવામાં આવે છે. 
• એ.પી.એમ.સી.માં અનાજ અને ખેતપેદાશો સુરક્ષિત રાખવા. 
• એ.પી.એમ.સી.માં વેચાણ અર્થે આવતી પેદાશો આ દિવસો દરમિયાન ટાળવી અથવા સુરક્ષિત રાખવી. 
આ અંગે વધુ જાણકારી આપના વિસ્તારના ગ્રામસેવક / વિસ્તરણઅધિકારી / તાલુકા અમલીકરણ અધિકારી / મદદનીશ ખેતી નિયામક (તા.મુ.), જિલ્લા ખેતીવાડી અધિકારી, નાયબ ખેતી નિયામક (તાલીમ), KVK અથવા કિસાન કોલ સેન્ટર ટોલ ફ્રી નંબર – ૧૮૦૦૧૮૦૧૫૫૧ નો સંપર્ક કરવો.