વિરોધ / આબુ-અંબાજી રેલવે પ્રોજેક્ટઃ ખેરાલુ-સતલાસણાના 14 ગામના 457 ખેડૂતોની જમીન સંપાદન મુદ્દે અસહમતી, કરી આ માંગ

• આબુ - અંબાજી રેલવે લાઈન માટે ખેડૂતોની જમીન સંપાદન મુદ્દો 
• 14 ગામના 457 ખેડૂતોની જમીન સંપાદન મુદ્દે અસહમતી 
• 90 હેકટર જમીન સંપાદન માટે હાથ ધરાઇ હતી સુનાવણી 

આબુ - અંબાજી રેલવે લાઇનના પ્રોજેક્ટને કેન્દ્ર સરકારે લીલી ઝંડી આપી છે. આ પ્રોજેક્ટનો અંદાજિત ખર્ચ રૂ.2500 કરોડ છે. આબુ-અંબાજી રેલવે પ્રોજેક્ટ માટે મહેસાણાના ખેરાલુ-સતલાસણા તાલુકામાં જમીન સંપાદનની કામગીરી હાથ ધરવામાં આવી છે. ખેતીની જમીન સંપાદન કરવા હાથ ધરાયેલી સુનાવણીમાં મોટાભાગના ખેડૂતોએ જમીન આપવા અસંમતિ દર્શાવી છે.

90 હેકટર જમીન સંપાદન માટે હાથ ધરાઇ હતી સુનાવણી 
સતલાસણા તાલુકાના ખેડૂતોએ જમીન સંપાદન મામલે વાંધા અરજી આપી હતી. ત્યારે ખેરાલુ પ્રાંત અધિકારી સમક્ષ 90 હેક્ટર જમીન સંપાદન માટે સુનાવણી હાથ ધરાઈ હતી. જેમાં ખેડૂતોએ અસંમતિ સાથે વાંધા રજૂ કર્યા હતા. ખેરાલુ પ્રાંત કચેરી ખાતે સંપાદન માટેની સુનાવણીમાં ખેડૂતોએ જમીન આપવા અસંમતિ દર્શાવી હતી. આ તકે ખેડૂતોએ નવા સર્વે થયેલ ટ્રેકને બદલે જૂના ટ્રેકનો ઉપયોગ કરવાની માંગ કરી હતી.  

નવા સર્વે થયેલ ટ્રેકને બદલે જૂના ટ્રેક ઉપયોગ કરવા માંગ 
રેલવે લાઈન પ્રોજેક્ટ માટે જમીન સંપાદન કરવા ખેરાલુ પ્રાંત કચેરી દ્વારા 20 ડિસેમ્બરથી રોજ જુદા-જુદા ગામના ખેડૂતોએ રજૂ કરેલા વાંધાઓની સુનાવણી હાથ ધરી રહ્યા છે. આજે ખેરાલુ તાલુકાના ખેડૂતોને સાંભળવામાં આવ્યા હતા. તો 27મી ડિસેમ્બરે સતલાસણાના નેદરડી,વજાપુર, મુમનવાસ અને બેડસ્માના ખેડૂતોને સાંભળવામાં આવ્યા હતા. અત્યાર સુધીમાં ખેરાલુ - સતલાસણાના 14 ગામના 457 ખેડૂતોએ જમીન સંપાદન મુદ્દે અસહમતી દર્શાવી છે.