- તુર્કીયેમાં ભૂકંપ બાદ બચાવકાર્ય યથાવત
- કાટમાળમાં ફસાયેલા આખા પરિવારને ઉગારી લેવાયો
- સોશિયલ મીડિયામાં વીડિયો વાયરલ
તુર્કીયે-સીરિયામાં આવેલા પ્રચંડ ભૂકંપના પગલે હજારોની સંખ્યામાં લોકોના મોત નિપજયા છે. જેને પગલે લાંબા સમયથી રાહત અને બચાવકાર્ય ચાલી રહ્યું છે. સેનાના જવાનો દ્વારા ધરાશાયી થયેલી ઇમારતો હટાવવામાં આવી રહ્યા છે. નિરાશા અને દયનિય સ્થિતિ વચ્ચે જીવન બચવાના ચમત્કારિક કિસ્સાઓ સામે આવી રહ્યા છે. ત્યારે રામ રાખે તેને કોણ ચાખે તેવો વધુ એક કિસ્સો સામે આવ્યો છે. બચાવ અભિયાનમાં પશ્ચિમી સીરિયાના ઇદલિબ વિસ્તારમાં અસરગ્રત આખા પરિવારને હેમખેમ ઉગારી લીધો હોવાનું સામે આવ્યું છે. જેમાં ત્રણ બાળકો અને બે પુખ્ત વયના લોકોને ઘરના કાટમાળમાંથી બહાર કાઢવામાં આવ્યા હતા. આ દરમિયાન મોટી સંખ્યા ઉપસ્થિત લોકોએ "ભગવાન મહાન છે."નો જય જય કાર કર્યો હતો.
સોશિયલ મીડિયા પર વીડિયો શેર
બચાવકાર્યનો વીડિયો સીરિયાના નાગરિક સુરક્ષા સ્વયંસેવક સંગઠન ધ વ્હાઇટ હેલ્મેટ દ્વારા સોશિયલ મીડિયામાં શેર કરવામાં આવ્યો છે. વ્હાઇટ હેલ્મેટ એકાઉન્ટ પરથી ટ્વિટ કરવામાં આવેલ વીડિયોમાં ખરો ચમત્કાર દેખાઈ રહ્યો છે. ખુશીના અવાજ જાણે આકાશને આંબતા હોય તેવા દ્રશ્યો સર્જાઇ રહ્યા છે. વિસનિયા ગામમાં ફસાયેલા આખા પરિવારને તેમના ઘરના કાટમાળમાંથી હેમખેમ બહાર કાઢી લેવામાં આવ્યો હતો.
29,896 લોકોના મૃત્યુ નિપજ્યા
તુર્કી અને સીરિયામાં ભૂકંપના કારણે વિકટ સ્થિતિનું નિર્માણ થયું છે. ભૂકંપને પગલે જીવ ગુમાવનારા લોકોની સંખ્યા પણ સતત વધી રહી છે. તેવામાં નવા આંકડા સામે આવ્યાક છે જેમાં જણાવ્યા અનુસાર અત્યાર સુધીમાં 29,896 લોકોના મૃત્યુ નિપજ્યા હોવાનું બહાર આવ્યું છે. તો આ દુર્ઘટનામાં 85 હજારથી વધુ લોકો ઘાયલ થયા હોવાનું પણ જાણવા મળી રહ્યું છે.
