સાચવજો.! / ચોમાસાના પહેલા વરસાદ બાદ એવું તો શું થયું કે અમદાવાદની હોસ્પિટલો દર્દીઓથી ઉભરાઇ, AMC એલર્ટ

• અમદાવાદ શહેરમાં વરસાદી માહોલ વચ્ચે રોગચાળો વકર્યો
• જૂન મહિનામાં સાદા મલેરિયાના 56 કેસ નોંધાયા
• AMC હેલ્થ વિભાગની ટીમ દ્વારા ચેકિંગ હાથ ધરાયુ 

અમદાવાદ શહેરમાં વરસાદી માહોલ વચ્ચે રોગચાળો વકર્યો છે. ડબલ ઋતુનો અહેસાસ થતાં સાદા મેલેરિયાના કેસ તેમજ વાયરલ તાવ, શરદી, ઉધરસના કેસમાં મોટાપાયે વધારો થયો છે. અમદાવાદમાં સોલા સ્થિત સિવિલ હોસ્પિટલમાં દર્દીઓની લાંબી લાઈનો લાગી છે. અત્રે જણાવીએ કે, સોલા સિવિલ હોસ્પિટલમાં છેલ્લા 2 દિવસમાં 3300થી વધુ દર્દીની ઓપીડી નોંધાઈ છે. ડબલ ઋતુના કારણે વાયરલ કેસમાં પણ સતત વધારો થઈ રહ્યો છે. 

પાણીજન્ય રોગચાળા વધ્યો
ચોમાસાની શરૂઆતમાં જ અમદાવાદમાં પાણીજન્ય અને મચ્છરજન્ય રોગચાળાએ માઝા મૂકી છે. જૂન મહિનામાં સાદા મલેરિયાના 56 કેસ નોંધાયા છે જ્યારે ઝેરી મલેરિયાનો 1 કેસ તેમજ ડેન્ગ્યુના 25 કેસ નોંધાયો છે. ચિકન ગુનિયાના 2 કેસ અને સામે આવ્યા છે. પાણી જન્ય રોગચાળામાં પણ વધારો થયો છે. ઝાડા ઉલ્ટીના 755 કેસ જ્યારે કમળાના 132 કેસ નોંધાયા છે. ટાઇફોઇડના 297 કેસ, કોલેરાનાં 4 કેસ નોંધાયા છે.

તંત્ર પણ કામે લાગ્યું 
શહેરમાં રોગચાળો વકરતા તંત્ર પણ કામે લાગ્યું છે અને શૈક્ષણિક સંસ્થા અને કંટ્રક્શન સાઈટ પર ચેકીંગ હાથ ધરાયું છે. જેમાં 4 સાઈટને સીલ કરવામાં આવી છે અને સ્ક્રેપ મટીરીયલ અને વરસાદી પાણીનો નિકાલ ન કરતા એકમો પણ સીલ કરાયા છે. તો બીજી તરફ AMC હેલ્થ વિભાગની ટીમ દ્વારા ચેકિંગ હાથ ધરાયુ છે. શહેરના 7 ઝોનમાં ચેકિંગ કરવામાં આવ્યું હતું. સાબરમતી, ચાંદખેડા, ગોતા સહિત વિસ્તારમાં ચેકિંગ કરાયું હતું.