Dev Uthani Ekadashi / કારતક મહિનાના શુક્લ પક્ષમાં આવે છે દેવઊઠી એકાદશી, જાણો મહત્વ અને શુભ મુહૂર્ત વિશે

• હિન્દુ ધર્મમાં એકાદશીનું ખાસ મહત્વ 
• જાણો ક્યારે છે દેવઊઠી એકાદશી 
• તમામ ઉપવાસોમાં સૌથી કઠીન છે એકાદશીનો ઉપવાસ 

દરેક પક્ષમાં આવતી એકાદશીનું હિન્દુ ધર્મમાં વિશેષ મહત્વ છે. દરેક એકાદશીનું પોતાનું મહત્વ છે. કાર્તક માસના શુક્લ પક્ષમાં આવતી એકાદશી દેવઊઠી એકાદશી તરીકે ઓળખાય છે. આ દિવસોમાં ચાર મહિના પછી ભગવાન વિષ્ણુનો શયનકાળ સમાપ્ત થાય છે અને તમામ શુભ અને માંગલીક કાર્યોની શરૂઆત થાય છે.

તમને જણાવી દઈએ કે અષાઢ મહિનાના શુક્લ પક્ષની દેવશયની એકાદશીના દિવસે ભગવાન શ્રી હરિ ચાર મહિના માટે યોગ નિદ્રામાં જાય છે. ભગવાનનો આ શયનકાળ દેવઉઠી એકાદશીના દિવસે સમાપ્ત થાય છે. આ ચાર મહિના માટે તમામ પ્રકારના શુભ અને માંગલીક કાર્યો કરવામાં આવતા નથી. તેને દેવપ્રબોધિની એકાદશી અથવા દેવોત્થાન એકાદશી તરીકે પણ ઓળખવામાં આવે છે. આવો જાણીએ આ વર્ષે દેવઉઠી  એકાદશી ક્યારે છે અને તેનો શુભ સમય ક્યારે છે.

દેવઉઠી એકાદશી તારીખ 2022
હિન્દુ કેલેન્ડર મુજબ 10મી જુલાઈના રોજ દેવશયની એકાદશીના દિવસથી ચાતુર્માસની શરૂઆત થઈ છે. અને તે ચાર મહિના એટલે કે દેવઉઠી એકાદશી સુધી ચાલશે. આ વખતે દેવઉઠી એકાદશી 4 નવેમ્બર, શુક્રવારના રોજ છે. આ દિવસથી દેવ જાગીને પોતાનું કાર્યભાર સંભાળે છે. તેના બીજા દિવસે તુલસી વિવાહ કરવામાં આવે છે. 

એકાદશી તિથિ 03 નવેમ્બર 2022 ના રોજ સાંજે 07:30 PMથી શરૂ થાય છે. એકાદશી તિથિ 04 નવેમ્બર 2022 ના રોજ સાંજે 6:08 વાગ્યે સમાપ્ત થશે. ઉદયતિથિ અનુસાર દેવઉઠી એકાદશી 4 નવેમ્બરે ઉજવવામાં આવશે.

દેવઉઠી એકાદશીનું મહત્વ
એકાદશીના ઉપવાસને હિંદુ ધર્મમાં તમામ ઉપવાસોમાં સૌથી મુશ્કેલ માનવામાં આવે છે. તેનું વર્ણન મહાભારતની કથામાં પણ જોવા મળે છે. એવી માન્યતા છે કે એકાદશીનું વ્રત કરવાથી વ્યક્તિને પાપોમાંથી મુક્તિ મળે છે. બીજી તરફ એકાદશી વ્રત વ્યક્તિની તમામ મનોકામનાઓ પૂર્ણ કરે છે અને વ્યક્તિ મૃત્યુ પછી વૈકુંઠ ધામની પ્રાપ્તિ કરે છે.