- LG હોસ્પિટલમાં પ્રસૂતાની રઝળપાટનો મામલો
- LG હોસ્પિટલમાં 6 કર્મચારીઓ સસ્પેન્ડ
- સમગ્ર ઘટનાનો વીડિયો આવ્યો હતો સામે
અમદાવાદની LG હોસ્પિટલના 6 કર્મચારીઓને સસ્પેન્ડ કરવામાં આવ્યા છે. હોસ્પિટલમાં ડિલિવરી બાદ મહિલાના પરિવારજનોએ બક્ષિસ ન આપતા કર્મચારીઓએ મહિલા સાથે માનવતાને ન છાજે તેવું વર્તન કર્યું હતું. આ સમગ્ર મામલો સામે આવ્યા બાદ અમદાવાદ કોર્પોરેશનના ડેપ્યુટી મ્યુનિસિપલ કમિશનરે આકરી કાર્યવાહી કરતા હોસ્પિટલના 6 કર્મચારીઓને સસ્પેન્ડ કરી દીધા છે.
પરિવારજનો પાસે માંગી હતી બક્ષિસ
પ્રાપ્ત માહિતી અનુસાર, ગત 30 એપ્રિલના રોજ ગોમતીપુર ખાતે રહેતી એક સગર્ભાને પીડા ઉપડતાં તેમને એલજી હોસ્પિટલમાં દાખલ કરાયા હતા. જે બાદ ડોક્ટરો દ્વારા તેમને ઓપરેશન રૂમમાં લઈ જવામાં આવ્યા હતા. આ દરમિયાન ઓપરેશન રૂમની બહાર બેઠેલા પરિવારજનો પાસે ત્યાંના કામદારોએ બક્ષિસની માંગ કરી હતી.
પરિવારે સવારે આપવા કહ્યું હતું
જોકે, મહિલાના સાસુ પાસે તે સમયે 100 રૂપિયા હતા, તે કામદારોને આપ્યા હતા. આ દરમિયાન કામદારોએ 2000 રૂપિયાની માંગ કરી હતી. તેઓએ સવારે પૈસા આપવા જણાવ્યું હતું. ડિલિવરી બાદ મહિલાને વોર્ડમાં લઈ જવાયા હતા. અહીં પણ કામદારોએ બક્ષિસની માંગણી કરી હતી. જેથી મહિલાના સાસુએ કહ્યું હતું કે અત્યારે પૈસા નથી, ઘરેથી લાવીને સવારે પૈસા આપીશું.
મહિલાના પરિવારે કરી હતી ફરિયાદ
જેથી રૂ.2 હજાર બક્ષિસ ન મળતા કર્મચારીઓએ મહિલાને હોસ્પિટલના કપડા તરત ઉતારવા કહી દીધું. મહિલા સાથે તેમના વૃદ્ધ સાસુ એકલા હોવાથી તેમણે કામદારોને કપડા કાઢી બીજા પહેરાવવા કહ્યું હતું. પરંતુ કામદારોએ કપડા કાઢીને મહિલાને નિર્વસ્ત્ર બેડ પર છોડી દીધી અને ત્યાંથી જતા રહ્યા. જે બાદ મહિલાના પરિવાર દ્વારા સમગ્ર મામલે ફરિયાદ કરવામાં આવી હતી. તો કામદારો પૈસાની માંગ કરી રહ્યા હોય તેવો વીડિયો પણ સામે આવ્યો હતો.
અમારી સાથે ખરાબ વર્તન કર્યુંઃ મહિલાના પતિ
કર્મચારીઓના કૃત્ય અંગે મહિલાના પતિએ જણાવ્યું હતું કે, રૂપિયા આપ્યા હતા છતાં કર્મચારી 2 હજારની માંગણી કરતા હતા. માનવતાને ન છાજે તેવું વર્તન અમારી સાથે થયું છે. મને અને મારા ભાઈને ધક્કા મારી વોર્ડમાંથી કાઢી મુક્યા હતા. કર્મચારીઓ મન ફાવે તેવું વર્તન કરે છે. તંત્ર આ બાબતે કોઈ ધ્યાન નથી આપતું.
