ગુજરાત / આવા લોકોના જવાથી કોંગ્રેસને કોઈ ફરક પડતો નથી : વિશ્વનાથ વાઘેલાના રાજીનામા મામલે પાર્થિવ કઠવાડિયાની પ્રતિક્રિયા

• વિશ્વનાથ વાઘેલાના નિવેદન સામે પાર્થિવ કઠવાડિયાની પ્રતિક્રિયા
• કમલમમાં  ખુરશીઓ ખાલી હતી એ બધાએ જોયુંઃપાર્થિવ રાજસિંહ
• આવા લોકોના જવાથી કોઈ ફરક નથી પડતોઃપાર્થિવ રાજસિંહ 

ગુજરાત યુથ કોંગ્રેસના પ્રમુખ વિશ્વનાથસિંહ વાઘેલાએ રાજીનામુ આપી આજે વિધિવત કેસરીયા કર્યા છે. આ મામલે કોંગ્રેસ નેતા પાર્થિવ કઠવાડિયાની પ્રતિક્રિયા સામે આવી છે. જેમાં તેમણે જણાવ્યું કે, તેઓ પોતાના ફાયદા માટે મોટુ પદ છોડીને ગયા છે. જે ભાજપમાં જોડાયા બાદ પણ નિષ્ફળ રહયા હોવાનો ઉલ્લેખ કરી કમલમા ખાતે આજે ખુર્શીઓ ખાલી હતી જે તમામ લોકોએ જોયું હોવાનું  પાર્થિવ કઠવાડિયાએ ઉમેર્યું હતું.

યુવા સંગઠનનું નેતૃત્વ કરવાનો મોકો મળ્યો પરંતુ ભાજપમાં જોડાયા
પાર્થિવ કઠવાડિયાએ વધુમાં જણાવ્યું હતું કે આઠ લાખથી વધુ યુવા કાર્યકરો કોંગ્રેસમાં જોડાયા છે.  જેનું નેતૃત્વ કરવાનો મોકો વિશ્વનાથસિંહ વાઘેલાને મળ્યો હતો પરંતુ તેઓ અંગત ફાયદા કોંગ્રેસ સાથે છેડો ફાડિને ભાજપમાં જોડાયા છે. ભાજપમાં આજના કાર્યક્રમનો ફિયાસ્કો થયો હોવાનો પણ યુથ કોંગ્રેસે સુર પુરાવ્યો હતો. એટલું જ નહિ કોંગ્રેસમાંથી  આવા  લોકો જતા રહે તો કોંગ્રેસને કોઈ ફરક ન પડતો હોવાનું પણ પાર્થિવ કઠવાડિયાએ જણાવ્યું હતું. યુવા કોંગ્રેસના પ્રમુખ પદને શોભાવાનો મોકો મળ્યો હતો હવે તેમની સાથે 3 ટકા પણ યુવાનો ન ગયા હોવાની વાતને સમર્થન આપ્યું હતું.
 
વિશ્વનાથ વાઘેલા આજે ભાજપના રંગે રંગાયા 
ગુજરાત વિધાનસભાની ચૂંટણી નજીક આવતાની સાથે જ રાજકારણમાં પક્ષ પલટા મૌસમ પૂર બહારમાં ખીલી છે. ત્યારે ગુજરાત યુથ કોંગ્રેસના પ્રમુખ વિશ્વનાથ વાઘેલાએ રાજીનામું ધરી દીધું હતું ત્યાંરબાદ આજે તેઑ ભાજપના રંગે રંગાયા છે.વિશ્વનાથ સિંહ વાઘેલા આજે કમલમ ખાતે ભાજપમાં જોડાયા છે. સી.આર. પાટીલની ગેરહાજરીમાં વિશ્વનાથ સિંહ વાઘેલા અને કોંગ્રેસના પૂર્વ યુથ કોંગ્રેસના આગેવાનો ભાજપમાં જોડાયા છે.  આજે કમલમ ખાતે વિશ્વનાથસિંહ વાઘેલા, વિનયસિંહ તોમર સહિત જીગર માળી, પાર્થ દેસાઈ, વિશાલ ઠાકોર, ભાવરી સમાજના ગુજરાત પ્રમુખ માલારામ ભાવરી ભાજપમાં જોડાયા છે. અનેક સમર્થકો સાથે કોંગ્રેસના યુવા નેતાઓએ આજે કેસરિયો ધારણ કર્યો છે. કોંગ્રેસના આ પૂર્વ દિગ્ગજોનું ગોરધન ઝડફિયાએ ખેસ પહેરાવીને ભાજપમાં સ્વાગત કર્યું હતું.