ધરણા / વડોદરામાં કોમન યુનિવર્સિટી એક્ટના વિરોધમાં પ્રદર્શન, MS યુનિવર્સિટી સરકારી કચેરી બનવાનો આરોપ

• વડોદરામાં કોમન યુનિવર્સિટી એક્ટ લાગુ કરવા મામલે વિરોધ પ્રદર્શન
• એક્ટ લાગુ થયા બાદ યુનિ. સરકારી બની જવાનો આરોપ
• ઓલ ઈન્ડિયા સેવ એજ્યુંકેશન કમિટીએ યોજ્યા ધરણા

ગુજરાત સરકાર ટૂંક સમયમાં રાજ્યની તમામ યુનિવર્સિટીઓમાં કોમન યુનિવર્સિટી એક્ટ લાગુ કરવાની વિચારણા કરી રહી છે. ત્યારે આ કોમન એક્ટ લાગુ કરવાનાં વિરોધમાં વડોદરા ખાતે આજે વિરોધ પ્રદર્શન યોજવામાં આવ્યું હતું.  ઓલ ઈન્ડિયા સેવ એજ્યુકેશન કમિટીએ ડેરીકેન સર્કલ પાસે ધરણા યોજ્યા હતા.  તેમજ એક્ટ લાગુ થયા બાદ એમ.એસ.યુનિવર્સિટી સરકારી કચેરી બની જવાનો આરોપ પણ લગાવ્યો હતો. આ કાર્યક્રમમાં યુનિવર્સિટી BUSA અને BUTA  સહિત વિદ્યાર્થીઓ, શિક્ષણવિદો અને નાગરિકોએ ધરણા પ્રદર્શન યોજ્યું હતું.

આ કાયદો સંપૂર્ણ પણે સરકારની દાદાગીરી ઉભી કરનારો કાયદો છેઃ હેમંત શાહ
આ બાબતે પ્રોફેસર હેમંત શાહે જણાવ્યું હતું કે,  ગુજરાત સરકાર જે કોમન યુનિવર્સિટી એકટ લાવી રહી છે. તેને પરિણામે બે મહત્વનાં મુદ્દા ઉપસ્થિત થાય છે. જેમાં સમાજનાં જુદા જુવા વર્ગો, વિદ્યાર્થીઓ, અધ્યાપકો, મજૂર મંડળો આવા તમામ વર્ગોનું જે પ્રતિનિધિત્વ ગુજરાત સરકારની સ્થાપેલી યુનિવર્સિટીઓનાં કાયદાઓમાં હતું.  તે બધું જતું રહે છે. ત્યારે સરકાર તેમની મનમાની કરે તેવા પ્રકારની જોગવાઈ આમાં કરવામાં આવી છે. બીજું યુનિવર્સિટી, કોલેજોનાં અધ્યાપકો અને કર્મચારીઓ એ સરકારી કર્મચારી ગણાય તો તેમની વાણી, અભિવ્યક્તિ તેમજ સ્વાતંત્રય ઉપર સંપૂર્ણ પણે તરાપ આવે તેમ છે.  કારણ કે ગુજરાત સરકારનાં 26 રૂલ્સ  નંબર 5,6,7,8 એમાં લાગુ પડશે. આ સંપૂર્ણ પણે સરકારની દાદાગીરી ઉભી કરનારો કાયદો છે અને તે શિક્ષણ ક્ષેત્રમાં હોઈ શકે નહી.