દિલ્હીના મુખ્યમંત્રી અરવિંદ કેજરીવાલને દિલ્હીની રાઉઝ એવન્યુ કોર્ટમાંથી ઝટકો લાગ્યો છે. કોર્ટે અદાલતના સમન્સ પર સ્ટે લગાવાનો ઇનકાર કર્યો છે. વચગાળાની રાહત માટેની અરજી પર સ્થગિત કરવાની કેજરીવાલની વિનંતીને ફગાવી દીધી છે. કોર્ટે કેજરીવાલને પેશીમાંથી મુક્તિ માટે નીચલી કોર્ટમાં જવા જણાવ્યું હતું. કેજરીવાલે દારૂ નીતિ કથિત કૌભાંડ સાથે જોડાયેલી મની લોન્ડરિંગ કેસની તપાસ કરી રહેલી EDની ફરિયાદ પર તેમને સમન્સ મોકલવાના મેજિસ્ટ્રેટના આદેશને પડકાર્યો હતો.
કોર્ટમાં હાજર થવાનો નિર્દેશ
કોર્ટે સમન્સ પર કોઈ સ્ટે મૂક્યો નથી જેમાં તેમને આવતીકાલે કોર્ટમાં હાજર થવાનો નિર્દેશ આપવામાં આવ્યો છે. કોર્ટે કહ્યું કે, જો કેજરીવાલ છૂટ ઈચ્છે છે તો તેમણે તેમને જારી કરાયેલા સમન્સ સમક્ષ હાજર થવું પડશે. કોર્ટના આદેશનું પાલન કરવા માટે કેજરીવાલે હાજર રહેવું પડશે. કોર્ટે કહ્યું કે, જો તેને શારીરિક હાજરીમાંથી મુક્તિ જોઈતી હોય તો સંબંધિત કોર્ટ સમક્ષ જઈ શકે છે. જેના માટે તેમણે આવતીકાલે કોર્ટમાં હાજર રહેવું પડશે.
કેજરીવાલે સમન્સને પડકાર્યો હતો
તમને જણાવી દઈએ કે, અરવિંદ કેજરીવાલે દિલ્હી એક્સાઈઝ પોલિસી કેસમાં રાઉઝ એવન્યુ કોર્ટ સમક્ષ જારી કરાયેલા સમન્સને પડકાર્યો હતો. રાઉઝ એવન્યુ કોર્ટે અરવિંદ કેજરીવાલને 16 માર્ચે કોર્ટમાં હાજર થવા માટે સમન્સ પાઠવ્યું હતું. કેજરીવાલે અરજીમાં કહ્યું હતું કે તેમને 16 માર્ચે હાજર રહેવામાંથી મુક્તિ આપવામાં આવે અને તેમના વકીલને તેમનું પ્રતિનિધિત્વ કરવાની મંજૂરી આપવામાં આવે. EDએ કેજરીવાલની આ અરજીનો વિરોધ કર્યો હતો.
વાંચવા જેવું: હાઈકોર્ટે તમિલનાડુ સરકારને આપ્યો ઝટકો, PM મોદીના રોડ શોને આપી મંજૂરી
EDએ શું કહ્યું હતું ?
EDએ ગુરુવારે કોર્ટમાં જારી કરાયેલા સમન્સ વિરુદ્ધ અરવિંદ કેજરીવાલની અરજીનો વિરોધ કરતા કહ્યું હતું કે, દિલ્હીના મુખ્યમંત્રીએ પોતે કોર્ટને ખાતરી આપી છે કે તેઓ 16 માર્ચે હાજર થશે. ED દ્વારા દાખલ કરવામાં આવેલી બે અલગ-અલગ ફરિયાદો વિરુદ્ધ કેજરીવાલની અરજીની સુનાવણી રાઉઝ એવન્યુ કોર્ટમાં થઈ હતી. EDએ આરોપ લગાવ્યો છે કે અનેક સમન્સ છતાં તેઓ દિલ્હી એક્સાઈઝ પોલિસી કેસમાં તપાસ એજન્સી સમક્ષ હાજર નથી થઈ રહ્યા.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
