અમદાવાદ / કંપનીનો મોબાઈલ નંબર હેક કરી બેંક એકાઉન્ટ કર્યું સાફ, 79,70,000 રૂપિયા ઉપાડી લીધા, PU ફોર્મ બનાવતી કંપની સાથે સાયબર ફ્રોડ

• અમદાવાદમાં પી. યુ. ફોર્મ બનાવતી કંપની સાથે છેતરપીંડી
• અજાણ્યા વ્યક્તિએ લાખો રૂપિયાની ઠગાઈ કરી
• કંપનીનો મોબાઈલ નંબર હેક કરી બેંક એકાઉન્ટ સાફ કરી નાખ્યું

ડિજિટલ યુગમાં સૌથી વધુ સાયબરને લાગતા ગુન્હાઓ સામે આવી રહ્યા છે. પોલીસના અનેક પ્રયાસો છતાં ભેજાબાજ આરોપીએ છાશવારે નવા નવા કિમીયાઓ શોધી છેતરપીંડી આચરતા હોય છે. ત્યારે આવો જ એક ચોંકાવનારો કિસ્સો અમદાવાદમાં સામે આવ્યો છે. જેમા અમદાવાદમાં PU ફોર્મ બનાવતી કંપની સાથે છેતરપિંડી થયાની ફરિયાદ ઉઠી છે. આ મામલે પોલીસે ગુન્હો નોંધી કાર્યવાહી હાથ ધરી છે.

એકાઉન્ટ માંથી 79.70 લાખની ઠગાઈ

અમદાવાદમાં PU ફોર્મ બનાવતી કંપનીને નિશાન બનાવી અજાણ્યા વ્યક્તિએ કોલ કર્યો હતો.જે દરમિયાન આંબા આંબલી બતાવી શિશામા ઉતાર્યા બાદ લાખો રૂપિયાની ઠગાઈ કરી હતી. બાદમાં યેનકેન પ્રકારે કંપનીનો મોબાઈલ નંબર હેક કરી લીધો હતો. અને બાદમાં બેંક એકાઉન્ટ સાફ કરી નાખતા માલિકના પગ નીચેથી જમીન સરકી ગઈ હતી. આરોપીઓએ બેંક એકાઉન્ટમાંથી રૂપિયા 79. 70 લાખ રૂપિયાની સેરવી લીધા હતા. જેને લઈને મામલો પોલીસ મથકે પહોંચ્યો હતો. કપંનીના MDએ સાયબર ક્રાઈમમાં ફરિયાદ નોંધાવતા પોલીસે સમગ્ર હકીકત જાણીને શખ્સ સામે ગુનો નોંધી તપાસના ચક્રો ગતિમાન કર્યા છે.

સાયબર ક્રાઇમ સામે જાગૃતિ માટે પોલીસ અનેક પ્રયાસો કરે છે. તાજેતરમા જ ગુજરાત પોલીસ દ્વારા સાયબર ક્રાઈમ જાગૃતિ અભિયાન હાથ ધરાયુ હતું. એપ્રિલ માસમાં સાયબર ક્રાઈમ મામલે જાગૃતિ લાવવા અભિયાન યોજાયું હતું. જેમાં પોલીસની શી ટીમ દ્વારા સિનિયર સિટિઝનોને રૂબરૂ મળી માર્ગદર્શન અપાયું હતું. ઉપરાંત સેમિનાર સહિત અનેક પ્રયાસો કરાઈ છે છતાં આવા ગુન્હા અટકવાનું નામ જ લેતા નથી.