- મુખ્યમંત્રી ભૂપેન્દ્ર પટેલ પણ કરશે કોરોનાની સમીક્ષા
- આરોગ્ય મંત્રી અને અધિકારીઓની હાજરીમાં થશે સમીક્ષા
- કેન્દ્રિય આરોગ્ય મંત્રીની બેઠક બાદ કરશે સમીક્ષા
કોરોનાના BF 7 વેરિયન્ટએ વિશ્વ આખામાં ઉપાધિ ઉભી કરી છે. ચીનમાં કોરોનાએ કહેર મચાવવાનું શરૂ કરતા હવે દેશ અને ગુજરાતમાં પણ કોરોનાનો હાઉ ઉભો થયો છે.આવી સ્થિતિ વચ્ચે રાજ્ય સરકાર એલર્ટ મોડમાં કામ કરી રહી છે. ગઈકાલે રાજયના મોટા ભાગના શહેરોમાં ઉચ્ચકક્ષાએથી આદેશ છૂટ્યા બાદ હોસ્પિટલોમાં બેડ અને ઓક્સીઝન પ્લાન્ટની વ્યવસ્થા વધારાઈ છે. તેવામાં પાણી પહેલા પાળ બાંધવાની માફક કોરોના મામલે મુખ્યમંત્રી ભૂપેન્દ્ર પટેલ સમીક્ષા કરશે.બીજી બાજુ કોરોના વાયરસને પરિસ્થિતિને લઈને સમીક્ષા માટે આવતીકાલે ભારતના તમામ મુખ્યમંત્રીઑ સાથે વડાપ્રધાન નરેન્દ્ર મોદી ચર્ચા કરી શકે છે. આ ઉપરાંત વડાપ્રધાન નરેન્દ્રભાઈ મોદીએ ગઈકાલે કોવિડ-19 માટે સાર્વજનિક સ્વાસ્થ્ય પ્રતિક્રિયાની સ્થિતિ અને તૈયારીઓની સમીક્ષા માટે એક ઉચ્ચ સ્તરીય બેઠકને સંબોધન કર્યું હતું.
મુખ્યમંત્રી ભૂપેન્દ્ર પટેલ સમીક્ષા કરશે
કોરોનાને લઈને રાજ્યમાં કેવી સ્થિતિ છે અને કોરોનાને ભરી પીવા કેવા પ્રકારના આગોતરા આયોજનો તેમજ તૈયારીઓ છે તે મામલે મુખ્યમંત્રી ભૂપેન્દ્ર પટેલ સમીક્ષા કરશે. આ દરમિયાન આરોગ્ય મંત્રી ઋષિકેશ પટેલે અને આરોગ્ય ખાતાના સિનિયર અધિકારીઓ પણ હાજરી આપશે. આજે બપોરે ત્રણ વાગ્યા બાદ કેન્દ્રીય સ્વાસ્થ્ય મંત્રી ડૉ.મનસુખ માંડવિયા રાજ્યોના સ્વાસ્થ્ય મંત્રીઓ સાથે કોવિડ-19ની સ્થિતિ અને તૈયારીઓને લઈને બેઠક કરી રહ્યા છે. કેન્દ્રીય આરોગ્ય મંત્રીની બેઠક બાદ સમીક્ષા કરવામાં આવશે.
ગઈકાલે કેબિનેટની બેઠકમાં પણ કોરોના મુદ્દે થઈ ચર્ચા
ચીનમાં કોરોનાની ભયાનક સ્થિતિને જોતાં ભારત પહેલાથી જ સતર્ક થઈ ગયું છે. ગઈકાલે ગાંધીનગર ખાતે મુખ્યમંત્રી ભૂપેન્દ્ર પટેલના અધ્યક્ષસ્થાને યોજાયેલી કેબિનેટની બેઠકમાં પણ કોરોના પર મહત્વપૂર્ણ ચર્ચા કરવામાં આવી હતી. જેમાં જણાવવામાં આવ્યું હતું કે, હાલ ગુજરાતમાં કોરોનાની સ્થિતિ સંપૂર્ણ નિયંત્રણમાં છે. આજની આ બેઠકમાં કોરોના અંગેની સ્થિતિ બગડે નહીં તે માટે અટકાયતી પગલાઓ મુદ્દે સૂચના આપવામાં આવી હતી.
કોરોનાને લઈને દેશભરની હોસ્પિટલોમાં થશે મોક ડ્રીલ
બીજી બાજુ કેન્દ્રીય સ્વાસ્થ્ય મંત્રાલયે આજે કહ્યું કે, મંગળવારથી દેશભરની હોસ્પિટલોમાં મોક ડ્રીલ હાથ ધરવામાં આવશે. મંત્રાલય ક્રિસમસ અને નવા વર્ષને લઈને નવી માર્ગદર્શિકા તૈયાર કરી રહ્યું છે. આરોગ્ય મંત્રાલયે જણાવ્યું હતું કે, રોગચાળો હજી સમાપ્ત થયો નથી. તહેવારોની સિઝન દરમિયાન, કોવિડ-યોગ્ય વર્તનને અનુસરવા માટે જાગૃતિ ફેલાવવી હિતાવહ છે. આ સાથે સરકારે કોવિડ માટે ટુ-ડ્રોપ નાકની વેક્સિનને પણ મંજૂરી આપી છે. સત્તાવાર સૂત્રોએ જણાવ્યું કે, જેમણે કોવિશિલ્ડ અને કોવેક્સિન લીધું છે તેઓ તેને હેટેરોલોગસ બૂસ્ટર તરીકે લઈ શકે છે. તેને આજથી રસીકરણ અભિયાનમાં સામેલ કરવામાં આવ્યું છે અને તે Cowin એપ્લિકેશન પર દેખાશે. હાલમાં આ ખાનગી હોસ્પિટલોમાં ઉપલબ્ધ રહેશે.
