વર્તમાન સમયમાં સોશ્યલ મીડિયાના આક્રમણ વચ્ચે બાળકો શેરી રમતોને જાણે કે ભૂલી જ ગયા છે ત્યારે મોરબીમાં બાળકોથી લઈને વૃદ્ધ સુધીના લોકો માટે રોટરી કબલ દ્વારા ધમાલ ગલીનું આયોજન કરવામાં આવ્યું હતું જેમાં બાળકો સહિતના લોકોને ભારે માજા માણી હતી.
બાળકોને મોબાઈલમાંથી બહાર કાઢવા કરાયું રમતોનું આયોજન
સ્કાય મોલ ખાતે ધમાલ ગલીનું આયોજન કરવામાં આવ્યું
આજે મોબાઈલ અને ગુગલના લીધે આખી દુનિયા આંગળીના ટેરવે આવી ગઈ છે જેથી કરીને બાળકો સતત મોબાઈલમાં રચ્યા પચ્યા રહેતા હોય છે ત્યારે અગાઉના સમયમાં શેરીમાં બાળકો ભેગા થાય અને ત્યાર બાદ લખોટી, થપો, ટાયર ફેરવવા, છાપું અને લંગડી, આંધળોપાટો, કોથળા દોડ, ધમાલિયો ધોકો, ભમરડો જેવી ધમાલ મસ્તી હવે શેરીઓમાં જોવા મળતી નથી અને ખાસ કરીને શેરીઓ શાંત થઈ ગયેલ છે તેવું કહીએ તો તેમાં જરાપણ અતિશયોક્તિ નથી ત્યારે ભુલાઈ કે વિસરાઈ ગયેલ શેરી રમતોને ફરી જીવંત કરવા માટે મોરબીની રોટરી ક્લબ સંસ્થા દ્વારા આજે રવિવારના રોજ શનાળા રોડ સ્કાય મોલ ખાતે ધમાલ ગલીનું આયોજન કરવામાં આવ્યું હતું. જેમાં બાળકો કોથળા દોડ,ધમાલિયો ધોકો, ભમરડો, લંગડી, આંધળોપાટો, મલ કુસ્તી, લખોટી, સાપસીડી, દોરડા કુદ સહિતની શેરી રમતોની મજા માણી હતી. આ કાર્યક્રમને સફળ બનાવવા માટે રોટરી ક્લબના પ્રેસિડન્ટ સોનલબેન શાહ, બંસીબેન શેઠ, રસેશ મહેતા સહિતનાએ જહેમત ઉઠાવી હતી.
સોનલ શાહ (પ્રેસિડેન્ટ, રોટરી કલબ મોરબી)
આ બાબતે રોટરી ક્લબ મોરબીનાં પ્રેસિડેન્ટ સોનલ શાહે જણાવ્યું હતું કે, અમે છેલ્લા ત્રણ વર્ષથી આ આયોજન કરીએ છીએ. ઘણી બધી રમતો આજના મોબાઈલના યુગમાં બાળકો ભૂલી ગયા છે. મોબાઈલમાંથી બહાર કાઢવા રમતોનું આયોજન કરવામાં આવ્યું છે. આ રમતોનાં માધ્યમથી બાળકોમાં સુસુપ્ત શક્તિઓને બહાર લાવવાનો પ્રયત્ન કરવામાં આવ્યો છે.
કશ્યપ પડસુમ્બીયા (ધમાલ ગલીની મજા માણનાર બાળક, મોરબી)
ધમાલ ગલીની મજા માણનારા કશ્યપ પડસુમ્બીયાએ જણાવ્યું હતું કે, અમે અહીંયા નવી નવી અનેક રમતો રમીએ છીએ. ઘરે તો મોબાઈલ સિવાય કંઈ જોવા જ નથી મળતું. અહીંયા અમે ખો-ખો, કબડ્ડી જેવી રમતો રમીએ છીએ. ઘરે તો માત્ર મોબાઈલ સિવાય કંઈ હોતું જ નથી. રવિવારે આવું સરસ આયોજન કરવામાં આવ્યું છે. જેથી રમવાની મજા આવી.
