Lok Sabha Elections 2024 : લોકસભા ચૂંટણીને લઈ રાજકીય પક્ષો પોતાના ઉમેદવારો અંગે મંથન કરી રહ્યા છે. આ તરફ ભારતીય જનતા પાર્ટી ઉમેદવારોની બીજી યાદી આજે એટલે કે રવિવારે (10 માર્ચ, 2024) આવી શકે છે. BJPની સેન્ટ્રલ ઇલેક્શન કમિટી (CEC)ની એક બેઠક સાંજે 6 વાગ્યાની આસપાસ યોજાવાની છે, જેમાં બીજી યાદીમાં સામેલ કરવા માટેના નામો પર ચર્ચા થઈ શકે છે. સૂત્રોનું માનીએ તો પાર્ટીના ઉમેદવારોની બીજી યાદીમાં 150 નામ હોઈ શકે છે.
મહત્વનું છે કે, બીજી યાદીના ઉમેદવારોના નામ પર વિચાર મંથન કરવા શનિવારે (9 માર્ચ, 2024) પાર્ટીની એક મોટી બેઠક યોજાઈ હતી. એવું કહેવામાં આવ્યું હતું કે, બેઠક દરમિયાન રાજ્યવાર ઉમેદવારોના નામોની પેનલ પર ચર્ચા કરવામાં આવી હતી. કેન્દ્રીય ગૃહમંત્રી અમિત શાહની સાથે ભાજપની કોર કમિટીની બેઠકમાં પાર્ટી ચીફ જેપી નડ્ડા, ગુજરાતના મુખ્યમંત્રી ભૂપેન્દ્ર પટેલ અને મધ્યપ્રદેશના મુખ્યમંત્રી મોહન યાદવ હાજર રહ્યા હતા. બેઠકમાં રાજ્યના ચૂંટણી પ્રભારીઓ, સહ-ચૂંટણી પ્રભારીઓ, પ્રદેશ પ્રમુખો અને રાજ્ય કોર કમિટીના મહત્વના નેતાઓ પણ દિલ્હીમાં પાર્ટી હેડક્વાર્ટર પહોંચ્યા હતા.
ભાજપની પ્રથમ યાદીમાં હતા 195 ઉમેદવારો
ભાજપના ઉમેદવારોની પ્રથમ યાદી 2 માર્ચ 2024ના રોજ આવી હતી. ત્યારબાદ 16 રાજ્યો અને બે કેન્દ્રશાસિત પ્રદેશો માટે 195 ઉમેદવારોના નામની જાહેરાત કરવામાં આવી હતી. આ યાદીમાં ઘણા દિગ્ગજ નેતાઓના નામ પણ હતા. પાર્ટીએ વડા પ્રધાન નરેન્દ્ર મોદીને યુપીના વારાણસીમાંથી , ગૃહ પ્રધાન અમિત શાહને ગુજરાતના ગાંધીનગરથી, સંરક્ષણ પ્રધાન રાજનાથ સિંહને લખનૌ (યુપીમાં) અને કેન્દ્રીય પ્રધાન જ્યોતિરાદિત્ય સિંધિયાને મધ્ય પ્રદેશના ગુનાથી મેદાનમાં ઉતાર્યા હતા.
વધુ વાંચો: મમતા સરકારનું મોટું એલાન, પ્રથમ વાર રામ નવમી પર કરાઇ એવી જાહેરાત કે ભક્તો થઇ ગયા ખુશખુશાલ
પ્રથમ યાદીમાં કયા રાજ્યમાંથી કેટલા ઉમેદવારોને ટિકિટ?
ઉમેદવારોની પ્રથમ યાદીમાં ભાજપે ઉત્તર પ્રદેશમાં 51, પશ્ચિમ બંગાળમાં 20, મધ્ય પ્રદેશમાં 24 અને ગુજરાત અને રાજસ્થાનમાં 15-15 બેઠકો માટે ઉમેદવારોને ટિકિટ આપી હતી. કેરળમાં 12, તેલંગાણા, આસામ, છત્તીસગઢ અને ઝારખંડમાં 11-11, જ્યારે દિલ્હીમાં 5, ઉત્તરાખંડમાં 3, જમ્મુ અને કાશ્મીર, ગોવા, ત્રિપુરા, આંદામાન અને નિકોબારમાં 2 અને દમણ અને દીવ એક-એક બેઠક માટે ઉમેદવારો જાહેર કરાયા હતા.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
