રાજકારણ / લોકસભા ચૂંટણી પહેલા રાજકોટમાં લેઉવા અને કડવા પાટીદારમાં ટિકિટ મુદ્દે ખેંચતાણ, અત્યારથી જ લોબિંગ શરૂ, જાણો કયા નામ ચર્ચામાં

• લોકસભા ચૂંટણી પહેલા રાજકોટમાં ઘમાસાણ
• લેઉવા-કડવા પાટીદાર વચ્ચે ટિકિટને લઇ ખેંચતાણ
• લેઉવા પટેલમાં નરેશ પટેલના નામની ચર્ચા 
• કડવા પટેલમાં મૌલેશ ઉકાણીની ચર્ચા તેજ 

Rajkot News: આવતા વર્ષે દેશમાં લોકસભાની ચૂંટણી યાજાવા જઈ રહી છે. ત્યારે લોકસભાની ચૂંટણી પહેલા રાજકોટ ભાજપમાં ટિકિટ મુદ્દે મથામણ શરૂ થઈ ગઈ છે. લેઉવા અને કડવા પાટીદારમાં ટિકિટ મુદ્દે ખેંચતાણ શરૂ થઈ છે. લેઉવા પટેલમાં નરેશ પટેલ અને ભરત બોઘરાના નામની ચર્ચા તેજ બની છે. જ્યારે કડવા પાટીદારમાં મૌલેશ ઉકાણી અને બ્રિજેશ મેરજાના નામની ચર્ચા ચાલી રહી છે. મહત્વનું છે કે ગઈકાલે સી.આર.પાટીલે મૌલેશ ઉકાણીને રાજકોટથી લડવાની ઓફર કરી હતી. જોકે, મૌલેશ ઉકાણીએ રાજકારણમાં આવવાનો ઈનકાર કર્યો હતો. સી.આર પાટીલના નિવેદન બાદ મોહન કુંડારિયાની ટિકિટ કપાવાની સંભાવના છે.

સી.આર પાટીલે આપ્યું હતું નિવેદન
રાજકોટમાં કડવા અને લેઉવા પાટીદાર સમાજે ટિકિટ માટે અત્યારથી જ લોબિંગ શરૂ કર્યું છે. ગતરોજ રાજકોટ ખાતે થેલેસેમિયાગ્રસ્ત લોકોને રક્ત પૂરૂ પાડવા રક્તદાન કાર્યક્રમનું આયોજન કરાયું હતું. જેમાં ભાજપના પ્રદેશ પ્રમુખ સી.આર પાટીલ પણ હાજર રહ્યા હતા. રાજકોટ ખાતે વિશ્વબંધુ રક્તદાન મહોત્સવમાં પહોંચેલા સી.આર પાટીલે નિવેદન આપ્યું હતું કે, એક ચર્ચા એવી છે કે મૌલેશભાઈને લોકસભામાં લઈ જવાના છે. મૌલેશભાઈ આવતા હોય તો જરૂર લઈ જઈએ. 

મારે રાજકારણમાં જવું નથીઃ મૌલેશ ઉકાણી
ત્યારે સી.આર પાટીલના લોકસભાના નિવેદન મામલે મૌલેશ ઉકાણીએ કહ્યું હતું કે, 'મારો રસ્તો દ્વારકાનો છે, મારે ગાંધીનગર કે દિલ્હી જવું નથી. મને ઓફર આપી તે બદલ સી.આર પાટીલનો આભાર. પરંતુ મારું કામ લોકસેવાનું છે નહીં કે રાજકારણ કરવાનું. મેં અગાઉ પણ કહ્યું છે કે મારે રાજકારણમાં જવું નથી.'

મુખ્યમંત્રીની મુલાકાતથી અનેક અટકળો
તો બીજી બાજુ થોડા દિવસ પહેલાં જ મુખ્યમંત્રી ભૂપેન્દ્ર પટેલ ખોડલધામના ચેરમેન અને પાટીદાર અગ્રણી નરેશ પટેલના નિવાસસ્થાને પહોંચ્યા હતા અને તેમના ઘરે ભોજન લીધું હતું. લોકસભાની ચૂંટણી પહેલાં જ અચાનક નરેશ પટેલ સાથે મુખ્યમંત્રીની મુલાકાતથી અનેક અટકળો લગાવાઈ રહી છે.