આગાહી / તાપણા તૈયાર રાખજો, બે દિવસ બાદ ગુજરાતમાં ફરી ગાત્રો થિજવતી ઠંડી પડશે, હવામાન વિભાગના વરતારા

• આગામી 5 દિવસને લઈને હવામાન વિભાગની આગાહી
• આગામી 5 દિવસ રાજ્યમાં તાપમાન સૂકું રહેશે
• ઠંડીને લઈને હવામાન વિભાગની વધુ એક આગાહી

શિયાળો હાલ પિક પર છે છેલ્લા કેટલાય દિવસથી હાડ થીજવતી ઠંડી પડી રહી છે. સિઝનની સૌથી વધુ ઠંડી સાથે પારો સિંગલ ડિઝીટમાં આવી રહયો છે. જેને લઈને જન જીવન અસ્તવ્યસ્ત બન્યું છે. મોડી રાત્રે અને વહેલી સવારે માર્ગો સુમસામ ભાસી રહ્યા છે. પરંતુ બે દિવસથી ઠંડીમાં આંશિક રાહત જોવા મળી રહી છે. તેવામાં ઠંડીને લઈને હવામાન વિભાગ દ્વારા વધુ એક આગાહી કરવામાં આવી છે.જેમાં આગામી બે દિવસ બાદ ઠંડીમાં વધારો નોંધાઇ તેવું જણાવાયું છે.

બે દિવસ બાદ 2થી 3 ડિગ્રી ઘટશે તાપમાન

હવામાન વિભાગના ડાયરેકટર ડો. મનોરમાં મોહંતીએ જણાવ્યું કે બે દિવસ બાદ 2 થી 3 ડિગ્રી તાપમાનમાં ઘટાડો થઇ શકે છે જે ને લઈને ઠંડીમાં સામાન્ય વધારો નોંધાઇ તેવું જણાઈ રહ્યું છે. વેસ્ટર્ન ડિસ્ટર્બન્સના કારણે તાપમાનમાં ઘટાડો થશે. જેની સૌરાષ્ટ્રના વિસ્તારો અને કચ્છ પંથકમાં અસર જોવા મળશે.

હજુ અનુભવાશે કાતિલ ઠંડી!

હવામાન વિભાગે જણાવ્યું કે બે દિવસ તાપમાનમાં બદલાવ જોવા મળશે. જેને લઈને આગામી 5 દિવસ ઠંડી અને શીત લહેર જોવા મળશે. આગામી 5 દિવસ રાજ્યમાં તાપમાન સૂકું રહેશે. મહત્વનું છે. કે નલિયામાં ગઈકાલે 7 ડિગ્રી તાપમાન નોધાયું હતુ. વેસ્ટર્ન ડિસ્ટર્બન્સના કારણે અમદાવાદમાં 13.4 ડિગ્રી આસપાસ તાપમાન નોંધાયું હતું.

 

ઠંડીનો નવો રાઉન્ડ શરૂ થવાનું અનુમાન
હવામાન વિભાગના જણાવ્યા અનુસાર, રાજ્યમાં 25 જાન્યુઆરીથી ઠંડીનો નવો રાઉન્ડ પણ શરૂ થવાનું અનુમાન છે. જેથી આ શિયાળાની સિઝન વધુ સમય સુધી ચાલશે. સવાર અને રાત્રિ દરમિયાન તીવ્ર ઠંડી અનુભવાશે, પરંતુ દિવસ દરમિયાન તાપમાન વધુ રહેવાની સંભાવના છે.