- કેન્દ્રીય ગૃહમંત્રી અમિત શાહ પંજાબ પહોંચ્યાં
- CM ભગવંત માન અને કેજરીવાલ પર કર્યો પ્રહાર
- ઓપરેશન બ્લૂ સ્ટારનો ઉલ્લેખ કરીને કોંગ્રેસ પર પણ પ્રહાર
પંજાબનાં ગુરદાસપુરમાં કેન્દ્રીય ગૃહમંત્રી અમિત શાહે PM મોદીનાં 9 વર્ષ પૂર્ણ થયાનાં અવસર પર એક જનસભાને સંબોધિત કરી હતી. આ દરમિયાન તેમણે મોદી સરકારની ઉપલ્બધીઓ જણાવી. શાહે કહ્યું કે ભાજપની મોદી સરકાર રિફોર્મ, પર્ફોમ, ટ્રાંસફોર્મનાં મંત્ર પર ચાલે છે. આ દરમિયાન તેમણે પંજાબની માન સરકાર પર પણ પ્રહાર કર્યાં હતાં.
ભગવંત માન અને કેજરીવાલ પર પ્રહાર
શાહે કહ્યું કે ભગવંત માને જે વાયદાઓ ચૂંટણી પહેલા કર્યાં હતાં તે અત્યાર સુધી પૂર્ણ નથી કર્યાં. મહાન શીખ ગુરુઓનાં રસ્તા પર ચાલનારા પંજાબનાં લોકોએ આઝાદી પહેલા અને આઝાદી બાદ દરેક સંકટમાં સમગ્ર દેશની રક્ષા કરી છે. તેમણે કહ્યું કે ભગવંત માનની પાસે, અરવિંદ કેજરીવાલની પાસે સમય છે પરંતુ તેમની પાસે રાજ્યની જનતા માટે જ સમય નથી. તેમણે કહ્યું કે ક્યારેક તો મને ખબર નથી પડતી કે તેઓ(ભગવંત) મુખ્યમંત્રી છે કે પાયલટ છે.તેમણે આગળ કહ્યું કે પંજાબની જનતા ભયભીત છે, લૉ એન્ડ ઓર્ડરનું સ્તર નીચે તરફ જઈ રહ્યું છે. તેમણે વિશ્વાસ અપાવ્યો કે પંજાબની જનતા આ બદલ માન સરકારને જરૂરથી સબક શિખવશે.
શાહે ઓપરેશન બ્લૂ સ્ટારનો ઉલ્લેખ કર્યો
શાહે 1984નાં નરસંહારને યાદ કરતાં કહ્યું કે તે કોંગ્રેસનાં નેતૃત્વે કર્યું હતું, તે સમયે હજારો શીખ ભાઈ-બહેનોની હત્યા કરી દેવામાં આવી હતી. 1984થી લઈને 2014 સુધી કોઈપણ દોષીતને સજા નથી પરંતુ તે બાદ મોદી સરકારે દોષીઓને જેલમાં મોકલવાનું કામ કર્યું.
પંજાબે દેશને સમાનતા અને સદ્ભાવનો પાઠ શિખવ્યો
શાહે પંજાબની જનતાને મહાન શીખ ગુરુઓનો ઉલ્લેખ કરતાં કહ્યું કે તેમણે ન માત્ર પંજાબ પરંતુ સમગ્ર દેશને દેશભક્તિ, સમાનતા અને સદ્ભાવનો પાઠ શિખવ્યો છે. શાહે પોતાના સંબોધનમાં કહ્યું કે પંજાબ એક એવું રાજ્ય છે કે જ્યાં ત્રિરંગાનાં ત્રણ રંગો જોવા મળે છે. અહીં શહીદોનાં બલિદાનમાં કેસરિયો, ગુરુઓની શાંતિ અને સદ્ભાવનો સફેદ રંગ અને ખેડૂતો જ્યારે દેશનાં ગોડાઉન ભરે છે તો અમને તેમાં લીલો રંગ જોવા મળે છે.
