આવ રે વરસાદ / 'આગામી 48 કલાક ભારે' આગાહી વચ્ચે અમદાવાદમાં ધોધમાર વરસાદ શરૂ, અનેક વિસ્તારો પાણી-પાણી

• ભારે વરસાદની આગાહી વચ્ચે અમદાવાદમાં ધોધમાર
• વાદળછાયા વાતાવરણની વચ્ચે વરસાદ શરૂ
• નરોડા, નવા નરોડા, નિકોલમાં મેઘરાજાની તોફાની બેટિંગ
• વરસાદના કારણે રસ્તાઓ પાણી-પાણી થઈ ગયા 
• લોકોને ગરમી અને બફારાથી રાહત મળી

અમદાવાદમાં 48 કલાક ભારે વરસાદની આગાહી કરવામાં આવી છે. જેને પગલે અમદાવાદના વાતાવરણમાં પલટો આવ્યો છે. શહેરમાં વાદળછાયા વાતાવરણની વચ્ચે ફરી વરસાદ શરૂ થયો છે. શહેરમાં ફરી વરસાદી માહોલ જામતા લોકોને ગરમી અને બફારાથી રાહત મળી છે. શહેરમાં જોરદાર વરસાદી માહોલ જામતા વાતાવરણમાં ઠંડક પ્રસરી ગઈ છે. 

અમદાવાદના વિવિધ વિસ્તારોમાં વરસાદ 
શહેરના  શાહપુર, જુના વાડજ, નવા વાડજ, શાહીબાગ, જગતપુર, રાણીપ, ન્યુ રાણીપ, ચાંદખેડા, મોટેરા, ઝુંડાલ, SG હાઈવે, બોપલ, ગોતા, ચાંદલોડિયા, ઘાટલોડિયા, ઈસનુપુર, દાણીલીમડા, મોટેરા, આંબાવાડી, મેમનગર, સેટેલાઈટ, પ્રહલાદનગર, જીવરાજ પાર્ક, જુહાપુરા, નરોડા, નારોલ સહિત તમામ વિસ્તારોમાં મેઘ મહેર જોવા મળી રહી છે. 

અમદાવાદીઓને ગરમીથી મળી રાહત
વરસાદના કારણે શહેરમાં ઠેકઠેકાણે વરસાદી પાણી જમા થઈ ગયા છે. વરસાદના કારણે વિઝિબિલિટી ઘટતાં વાહન ચાલકો હેડ લાઇટ ચાલુ કરીને વાહન ચલાવવા મજબૂર બન્યા છે. વરસાદના કારણે  શહેરના કેટલાક વિસ્તારમાં ટ્રાફિકજામની સ્થિતિ સર્જાઈ છે. વરસાદ પડતાં નાગરિકોને ગરમીથી રાહત મળી છે. આપને જણાવી દઈએ કે હવામાન વિભાગ દ્વારા આગામી 48 કલાક અમદાવાદમાં ભારે વરસાદની આગાહી કરવામાં આવી છે. 

ગઈકાલે તૂટી પડ્યો હતો ભારે વરસાદ 
અત્રે ઉલ્લેખનીય છે કે, ગઈકાલે દિવસભરના અસહ્મ ઉકળાટ બાદ અચાનક મેઘરાજા પૂરબહાર ખીલી ઊઠ્યા હતા. પૂર્વ અમદાવાદમાં પોણા ત્રણ ઈંચ અને પશ્ચિમ અમદાવાદમાં બે ઈંચથી વધુ વરસાદ માત્ર સાંજના 6થી 8 વાગ્યાની વચ્ચે તૂટી પડતાં હજારો અમદાવાદીઓ રોડ પર ફસાઈ ગયા હતા. આમાં પણ વરસાદની નવી પેટર્ન મુજબ ગોતામાં ધીમી ધારના ઝાપટાં પડ્યા હતા, જ્યારે સિંધુભવન રોડ સહિતના વિસ્તારમાં અનરાધાર વરસાદ વરસતા લોકો તોબા પોકારી ઊઠ્યા હતા. 

મીઠાખળી અંડરપાસ કરાયો હતો બંધ
શહેરમાં ઠેર-ઠેર પાણી ભરાતા મીઠાખળી અંડરપાસને બંધ કરવો પડ્યો હતો. તેમજ વાસણા બેરેજના નવ દરવાજા ખોલી નાખવામાં આવ્યા હતા. અચાનક પડેલા ભારે વરસાદના કારણે ઠેર-ઠેર ટ્રાફિક જામના દ્રશ્યો જોવા મળ્યા હતા.