વરસી / PHOTOS : અમદાવાદની એ ગોઝારી ઘટનાને થયા 13 વર્ષ, સીરિયલ બ્લાસ્ટથી શહેર હચમચી ઉઠ્યું હતું

• અમદાવાદ બોમ્બ બ્લાસ્ટના 13 વર્ષ પુરા 
• 13 વર્ષ પહેલા 26 જુલાઈએ હચમચી ઉઠ્યું હતું અમદાવાદ 
• 70 મિનિટમાં થયા હતા 21 બ્લાસ્ટ 

26 જુલાઈ 2008નો દિવસ અમદાવાદ માટે સૌથી ભયંકર દિવસ હતો. આજથી 13 વર્ષ પહેલા અમદાવાદમાં સીરીયલ બોમ્બ બ્લાસ્ટ થયા હતા જેના કારણે આખું અમદાવાદ હચમચી ઉઠ્યું હતું. તે દિવસે સાંજના સમયે અમદાવાદીઓએ કલ્પના પણ નહી કરી હોય કે તેમને આવો પણ દિવસ જોવો પડશે. 

70 મિનિટ  સુધી બ્લાસ્ટ 

સતત 70 મીનીટ સુધી થયેલા બ્લાસ્ટને કારણે અમદાવાદના લોકો ચારેય બાજુ દોડતા થઈ ગયા હતા. સૌ કોઈને તે સમયે પોતાનો જીવ બચાવા ઘર તરફ દોટ મુકી હતી. 70 મીનીટમાં 21 જેટલા બોમ્બ બ્લાસ્ટ થયા હતા જેમાં ઘણા લોકોએ પોતાનો જીવ ગુમાવ્યો હતો. 


 

સિવિલ હોસ્પિટલમાં 2 બ્લાસ્ટ 

આતંકવાદીઓએ એટલી પ્લાનીંગ સાથે હુમલો કર્યો કે તેમણે ઘાયલોને પણ નહોતા છોડ્યા. બોમ્બ બ્લાસ્ટમાં ઘાયલ લોકોને જ્યારે અમદાવાદની સિવિલ હોસ્પિટલમાં ખસેડવામાં આવ્યા ત્યારે સિવિલ હોસ્પિટલમાં પણ 2 વખત બોમ્બ બ્લાસ્ટ થયા જેના કારણે હોસ્પિટલ તંત્ર પણ દોડતું થઈ ગયું હતુ.



રસ્તા પર મૃતદેહો 

હોસ્પિટલમાં બ્લાસ્ટ થવાને કારણે જે ઘાયલોને હોસ્પિટલમાં લાવવામાં આવ્યા હતા. તેમજ જે પણ લોકો હોસ્પિટલમાં પહેલાથી દાખલ હતા. તેમના પણ મોત થયા હતા 13 વર્ષ પહેલા 26 જુલાઈ 2008ના રોજ અમદાવાદની હાલત સાંજના સમયે એવી હતી કે ઘણા વિસ્તારોમાં રસ્તા પર મૃતદેહો પડ્યા હતા. પોલીસ સહિત તંત્ર પણ દોડતું થઈ ગયું હતું. 

કુલ 56 લોકોના મોત 

બોમ્બ બ્લાસ્ટમાં કુલ 56 લોકોના મોત થયા હતા. આતંકીઓએ શહેરની બસોને પણ ટાર્ગેટ કરી હતી. જેના કારણે બસમાં સવાર મુસાફરોનું પણ મોત થયું. આ સિવાય શહેરના મણિનગર વિસ્તારમાંથી પણ બે જીવતા બોમ્બ મળી આવ્યા હતા. ઉપરાંત એક દિવસ પહેલા શહેરના હાટકેશ્વર વિસ્તારમાંથી પણ એક બોમ્બ મળી આવ્યો હતો જેને નિષ્ક્રિય કરી દેવામાં આવ્યો હતો.

કેટલાય લોકોએ પોતાના સ્વજનો ગુમાવ્યા 

ઉલ્લેખનીય છે કે આજે પણ જ્યારે 2008ની 26 જુલાઈની વાત કરવામાં આવે ત્યારે અમદાવાદ આખું ધ્રુજી ઉઠે છે. કેટલાય લોકોએ પોતાના સ્વજનોને ગુમાવ્યા હતા. 26 જુલાઈનો એ ગોઝારો દિવસ એ લોકો માટે પણ ઘણો દુખ દાયક છે કે જે લોકો આ ઘટનાનો ભોગ બન્યા છે.