મોટા સ્ટાર સકંજામાં / રણબીર કપૂર બાદ કપિલ શર્મા, હુમા કુરેશીને પણ EDનું તેડું, મહાદેવ બેટિંગ એપ મામલે કસાયો ગાળિયો

• મહાદેવ સટ્ટાબાજી એપ કેસમાં હવે કેટલાક વધુ સ્ટાર્સના નામ સામે આવ્યા 
• કપિલ શર્મા, અભિનેત્રી હુમા કુરેશી અને હિના ખાનના નામ સામે આવ્યા
• અગાઉ ઈડીએ રણબીર કપૂરને સમન્સ પાઠવી પૂછપરછ માટે બોલાવ્યા છે

મહાદેવ સટ્ટાબાજી એપ કેસમાં હવે કેટલાક વધુ સ્ટાર્સના નામ સામે આવ્યા છે. અગાઉ ઈડીએ રણબીર કપૂરને સમન્સ જારી કર્યું હતું. હવે કેટલાક વધુ સ્ટાર્સને બોલાવવામાં આવ્યા છે. જો સૂત્રોનું માનીએ તો તે સ્ટાર્સના નામ છે કોમેડિયન કપિલ શર્મા, અભિનેત્રી હુમા કુરેશી અને હિના ખાન. 4 ઓક્ટોબરે રણબીર કપૂરને સમન્સ જારી કરવાના સમાચાર સામે આવ્યા હતા. હવે માહિતી મળી રહી છે કે EDએ કપિલ શર્મા, હુમા કુરેશી અને હિના ખાનને સમન્સ પાઠવ્યા છે. અગાઉ એવું પણ જાણવા મળ્યું હતું કે સની લિયોન, કૃષ્ણા અભિષેક, પુલકિત સમ્રાટ સહિત 14 સ્ટાર્સ EDના રડાર પર છે. આ તમામ સ્ટાર્સે મહાદેવ સટ્ટાબાજી એપ કેસના આરોપી સૌરભ ચંદ્રાકરના લગ્નમાં હાજરી આપી હતી. જોકે કપિલ, હુમા અને હિનાનું નામ તે 14 સ્ટાર્સમાં નહોતું. પરંતુ હવે ત્રણેયને પણ સમન્સ પાઠવવામાં આવ્યા છે.

રણબીરે બે અઠવાડિયાનો સમય માંગ્યો

તમને જણાવી દઈએ કે, રણબીર કપૂરને 6 ઓક્ટોબરે હાજર થવા માટે સમન્સ જારી કરવામાં આવ્યું હતું, જેથી તેની પૂછપરછ થઈ શકે. તેને EDની રાયપુર શાખામાં હાજર થવું પડ્યું. જો કે, સૂત્રના જણાવ્યા અનુસાર, રણબીરે ED પાસે બે અઠવાડિયાનો સમય માંગ્યો છે. આ મામલામાં કપિલ શર્મા, હુમા કુરેશી અને હિના ખાનના નામ પણ જોડાયા છે. સની લિયોન, કૃષ્ણા અભિષેક અને પુલકિત સમ્રાટ ઉપરાંત, 14 સ્ટાર જેઓ પહેલેથી જ EDના રડાર પર છે તેમાં વિશાલ દદલાની, ટાઈગર શ્રોફ, નેહા કક્કર, એલી અવરામ, ભારતી સિંહ, ભાગ્યશ્રી, કીર્તિ ખરબંદા અને નુસરત ભરૂચાનો સમાવેશ થાય છે. દુબઈમાં સૌરભ ચંદ્રાકરના લગ્નમાં પાકિસ્તાની ગાયક આતિફ અસલમ અને રાહત ફતેહ અલી ખાને પણ હાજરી આપી હતી. સૌરભ પર હવાલા દ્વારા સ્ટાર્સને પૈસા આપવાનો આરોપ છે. મહાદેવ બેટિંગ એપ કેસમાં EDની તપાસમાં 5,000 કરોડ રૂપિયાનો ભ્રષ્ટાચાર બહાર આવ્યો હતો.