- GNLUમાં જાતીય સતામણી અંગે હાઈકોર્ટનો કડક આદેશ
- નવેસરથી સત્ય શોધક સમિતિ રચવા હાઇકોર્ટનો આદેશ
- ગુજરાત નેશનલ લો યુનિવર્સિટીમાં બન્યા હતા બનાવો
- કથિત દુષ્કર્મ અને જાતીય સતામણીને લઇ થઇ હતી સુઓમોટો અરજી
Ahmedabad News: અમદાવાદની ગુજરાત નેશનલ લો યુનિવર્સિટી (GNLU)માં જાતીય સતામણી અને કથિત દુષ્કર્મ અંગે હાઇકોર્ટે કડક આદેશ આપ્યો છે. હાઈકોર્ટે નવેસરથી સત્ય શોધક સમિતિ રચવા માટે GNLUને આદેશ આપ્યો છે. સાથે જ હાઈકોર્ટે કહ્યું છે કે, રજિસ્ટારે રજૂ કરેલા સોગંદનામામાં મામલાને દબાવવાનો પ્રયાસ કરાયો છે. GNLU સંસ્થાની છબી બચાવવા પ્રયાસ થઇ રહ્યો છે.
શું છે સમગ્ર મામલો?
ગુજરાત નેશનલ લો યુનિવર્સિટીમાં કથિત દુષ્કર્મ અને જાતીય સતામણીની બે ઘટના સામે આવી હતી. યુનિવર્સિટી ખાતે બીજા વર્ષની એક વિદ્યાર્થિની સાથે કથિત દુષ્કર્મ અને એક સમલૈંગિક યુવક સાથે જાતીય સતામણીની ઘટના સામે આવી હતી. જેને લઈને ગુજરાત હાઈકોર્ટમાં સુઓમોટો પિટિશન દાખલ કરી હતી.
GNLU અને રિજિસ્ટ્રારને મોકલી હતી નોટિસ
આ મામલાની ગંભીરતાથી નોંધ લઈને હાઈકોર્ટે ગુજરાત નેશનલ લો યુનિવર્સિટી (GNLU) અને રિજિસ્ટ્રારને નોટિસ મોકલી હતી અને પીડિતોના નિવેદન નોંધીને યોગ્ય પગલા ભરવાનો હુકમ કર્યો હતો અને 10 ઓક્ટોબર સુધીમાં રિપોર્ટ રજૂ કરવાનો આદેશ પણ આપ્યો હતો.
રિપોર્ટ રજૂ કરવાનો આપ્યો હતો આદેશ
હાઈકોર્ટે કહ્યું હતું કે, કથિત દુષ્કર્મ અને જાતીય સતામણીની બે ઘટનાઓમાં ભલે કોઈ લેખિત ફરિયાદ ન થઈ હોય, પરંતુ જો આ અંગેની જાણ હોય તો યુનિવર્સિટીએ તપાસ કરીને પગલા ભરવાની જરૂર હતી. આ હાઈકોર્ટે યુનિવર્સિટીને 10મી ઓક્ટોબર સુધીમાં યોગ્ય પગલા ભરી રિપોર્ટ રજૂ કરવાનો આદેશ આપ્યો હતો. હાઈકોર્ટે 10 ઓક્ટોબર સુધીમાં શું પગલા લેવાયા તેનો રિપોર્ટ રજૂ કરવાનો યુનિવર્સિટીને આદેશ આપ્યો હતો.
નવેસરથી કમિટી રચવાનો આદેશ
હાઈકોર્ટના આદેશને પગલે સમગ્ર કેસમાં GNLU તરફથી સોગંદનામું રજૂ કરાયું હતું. જે મામલે હાઈકોર્ટે જણાવ્યું કે, રજીસ્ટારે રજૂ કરેલ સોગંદનામામાં મામલાને દબાવવાનો પ્રયાસ કરવામાં આવ્યો છે. GNLU સંસ્થાની છબી બચાવવા પ્રયાસ થઇ રહ્યો છે. જેથી ગુજરાત નેશનલ લો યુનિવર્સિટી દ્વારા નવેસરથી ફેક્ટ ફાઇન્ડીંગ કમિટીની રચવા કરવામાં આવે.
