અહેવાલ / કટોકટીમાં સપડાયેલી DHFLને ખરીદવા આ ઉદ્યોગપતિઓએ રસ દાખવ્યો

ગૌતમ અદાણીની આગેવાની હેઠળનું અદાણી ગ્રુપ અને પિરામલ ગ્રુપ કટોકટીમાં સપડાયેલી દેવાન હાઉસિંગ ફાઇનાન્સ લિમિટેડ (DHFL) કંપનીને ખરીદવા માટેના સૌથી મોટા ખેલાડીઓ ગણવામાં આવી રહ્યાં છે એવું સૂત્રોનું માનવું છે. 

આ કંપનીને ખરીદવામાં એપોલોએ પણ પોતાનો રસ દાખવ્યો છે. નોંધનીય છે કે મુશ્કેલીમાં ફસાયેલી આ કંપની મુદ્દે RBIએ આ બુધવારે ટિપ્પણી કરી હતી કે તે DHFLની સત્તાવાર નાદારીની પ્રકિયા શરુ કરવા જઈ રહી છે. 

આ ઉપરાંત RBIએ કડકાઈ સાથે DHFLના તમામ બોર્ડ ઓફ ડિરેક્ટર્સને સસ્પેન્ડ કરી દીધા હતા. આ માટે કારણ આપતા તેમણે જણાવ્યું હતું કે આ બોર્ડ ઓફ ડિરેક્ટર્સની હાજરી કંપની ઘણા મોટા નાણાંકીય દેવા અને કંપનીની હાલની અવ્યવસ્થા માટે જવાબદાર છે. 

રિઝર્વ બેન્કે તેના Reserve Bank of India Act, 1934 ની કલમ 45 IE (2)નો ઉપયોગ કરીને 'ઇન્ડિયન ઓવરસીઝ બેન્ક'ના પૂર્વ CEO અને મેનેજીંગ ડાયરેક્ટર આર. સુબ્રમણ્યકુમારને DHFLના એડમિનિસ્ટ્રેટર તરીકે નીમ્યા છે.

RBIના આ નિર્ણય પછી DHFL દેશની પહેલી નોન બેન્કિંગ ફાઇનાન્શિયલ કંપની NBFC બનવા જઈ રહૈ છે જે સરકારના નવા નિયમો અનુસાર નેશનલ કંપની લો ટ્રીબ્યુનલ NCLT પહોંચી હોય.