બાળક તરછોડાયું / આ ઘટનાઓ ક્યારે રોકાશે ? નડિયાદમાં અનાથઆશ્રમની બહાર કોઈ બાળક મૂકી ગયું, તબિયત નાજુક

• રાજ્યમાં બાળકને તરછોડવાની વધુ એક ઘટના
• અનાથ આશ્રમ બહાર નવજાત બાળકને ત્યજી દેવાયું 
• નવજાત બાળકને લઈને પોલીસે તપાસ હાથ ધરી  

ગુજરાતમાં એક બાદ એક એવી ઘટનાઓ સામે આવી રહી છે જે જોતા લાગે છે કે હવે ગુજરાત પણ ક્રાઈમનું હબ બનવા જઈ રહ્યું છે. કેમ છેલ્લા કેટલાક દિવસોમાં આપઘાત, બળાત્કાર, અપહરણ, હત્યા, નશીલા પર્દાર્થોની હેરાફેરી તેમજ બાળકોને ત્યજી દેવાની ઘટના બની રહી છે, ગાંધીનગર, અમદાવાદ બાદ હવે શિક્ષણની નગરી ગણાતા નડિયાદમાં પણ બાળકને તરછોડી દેવાનો કિસ્સો સામે આવ્યો છે.  

રાજ્યમાં બાળકને તરછોડવાની વધુ એક ઘટના

નડિયાદમાં નવજાત બાળકને અનાથ આશ્રમમાં તરછોડી દેવાની ઘટના સામે આવ્યા બાદ આસપાસના લોકોમાં ચકચાર મચી ગયો છે. અજાણી વ્યક્તિ દ્વારા અનાથ આશ્રમના પ્રાગણમાં જ બાળકને મુકી ચાલી જતા સમગ્ર મામલે પોલીસને જાણ કરવામાં આવી છે. જો કે તરછોડાયેલા બાળકની તબિયત નાજુક હોવાનું મનાઈ રહ્યું છે, અનાથ આશ્રમના સંચાલકોએ બાળ સુરક્ષા વિભાગ તેમજ પોલીસને જાણ કરતા બાળક ત્યજી દેવા મામલે તપાસનો ધમધમાટ શરૂ કર્યો છે. આમ આવી રીતે બાળકને અનાથ આશ્રમમાં મુકી જવાને લઈને સવાલો ઉભા થયા છે, બાળકનું અપહણર બાદ બાળકને આશ્રમમાં ત્યજી દેવામાં આવ્યુ છે કે પછી અન્ય કોઈ કારણોસર બાળકને તરછોડી દેવામાં આવ્યું તે દિશામાં પણ પોલીસ દ્વારા તપાસ હાથ ધરવામાં આવી છે. 

નડિયાદમાં અનાથ આશ્રમ બહાર નવજાત બાળકને ત્યજી દેવાયું 

મહત્વનું છે કે રાજ્યમાં બાળક તરછોડવાની કિસ્સા વધી રહ્યા છે. આ અગાઉ અમદાવાદમાં 5 નવેમ્બરે એક નાનકડી બાળકી કૃષ્ણનગર વિસ્તારમાં આવેલ મહાલક્ષ્મી મંદિર પાસે amts બસ સ્ટેન્ડ પરથી મળી આવી હતી, તે પહેલા પણ 14 ઓક્ટોબરે શ્રીનંદ સિટી પાસે જ્યારે 29 ઓક્ટોબરે અમરાઈવાડીમાં મહાલક્ષ્મી નગર પાસે બાળક મળી આવ્યું હતું. સમાજમાં માનવીય મૂલ્યોનું કેટલી હદે પતન થઈ ગયુ છે, તે બાળક ત્યજી દેવાની ઘટના પરથી જોઈ શકાય છે અગાઉ પણ ગાંધીનગરના પેથાપુરમાં બાળક ત્યજી દેવાની ઘટના સામે આવી જેમાં ઘટનાનો પર્દાફાશ થતા બાળકની માતાની હત્યા બાદ બાળકને ત્યજી દેવામાં આવ્યું હોવાનું સામે આવ્યું હતું, ત્યારે હવે નડિયાદમાં તરછોડાયેલા બાળક મામલે કેવા ખુલાસા સામે આવે છે તે જોવાનું રહ્યું ?