વલસાડ / 50 થી 60 જેટલા વિદ્યાર્થીઓ ભરેલી બસે ધરમપુરના સાડળવેરા ગામે પલટી ખાધી, 6ને ગંભીર ઇજા, ચીસાચીસ મચી

• વલસાડના ધરમપુરના સાડળવેરા ગામે બસ પલટી 
• ખોબા ગામે જતા વિદ્યાર્થીઓની બસ પલટી 
• બસમાં સુરત SVNITમાં અભ્યાસ કરતા વિદ્યાર્થીઓ હતા સવાર 

રાજ્યમાં બેફામ વાહન ડ્રાઈવના કારણે અવાર નવાર રોડ અકસ્માતની ઘટનાઓ ખૂબ જ વધી રહી છે. ત્યારે અમદાવાદમાં પિકઅપ વાન અને કારનો ભયજનક અકસ્માત સર્જાયો છે. તો બીજી તરફ વલસાડના ધરમપુરના સાડળવેરા ગામે બસ પલટી મારી છે. જે ઘટનામાં 6 વિદ્યાર્થીઓને ગંભીર ઇજા પહોંચી છે.

ભારે જહેમતે સ્થાનિકોએ વિદ્યાર્થીઓને બહાર કાઢ્યા
વલસાડના ધરમપુરના સાડળવેરા ગામે બસ પલટી મારી છે. ખોબા ગામે જતા વિદ્યાર્થીઓની બસ પલટી મારી હતી. જેમાં બસમાં સુરત SVNITમાં અભ્યાસ કરતા વિદ્યાર્થીઓ સવાર હતા. ભારે જહેમતે સ્થાનિકોએ વિદ્યાર્થીઓને બહાર કાઢ્યા હતા. ઘટનામાં 6 વિદ્યાર્થીઓને ગંભીર ઇજા પહોંચી છે. તમામ ઘાયલ વિદ્યાર્થીઓને ધરમપુર હોસ્પિટલ ખાતે ખસેડાયા છે. બસમાં 50થી 60 જેટલા વિદ્યાર્થીઓ સવાર હતા.

વસ્ત્રાલ ન્યુ RTOથી રિંગરોડ માર્ગ પર અકસ્માત
અમદાવાદમાં પિકઅપ વાન અને કારનો ભયજનક અકસ્માત સર્જાયો હતો. વસ્ત્રાલ ન્યુ RTOથી રિંગરોડ માર્ગ પર ઘટના બની છે. સળિયા ભરેલુ પિકઅપ વાન કાર સાથે અથડાયુ છે. પિકઅપ વાન કાર સાથે અથડાતા સળિયા કારમાં ઘૂસ્યા છે. સદનસીબે ઘટનામાં કાર ચાલકને સામાન્ય ઈજા પહોંચી છે. પિકઅપ વાનના ચાલકને લોકોએ પોલીસ હવાલે કર્યો છે.

ગેંડા સર્કલ પર અકસ્માત
વડોદરાના ગેંડા સર્કલ પર અકસ્માતને લઈને બબાલ થઈ હતી. રોંગ સાઈડમાં બાઇક ચાલક આવ્યો અને કાર સાથે અથડાયો હતો. અકસ્માત બાદ બોલાચાલી થયા બાદ મારામારી કરી હતી. કારમાં સવાર મહિલા અને બાઈક ચાલક યુવક વચ્ચે મારામારી થઈ હતી. સ્થાનિક ટ્રાફિક પોલીસે મામલો થાળે પાડ્યો હતો. ઘટનાને પગલે ટ્રાફિક જામ થયો હતો.