- 26 જાન્યુઆરી પહેલા દિલ્હીમાંથી ઝડપાયા 2 આતંકીઓ
- પોલીસની સ્પેશિયલ ટીમે 2 આતંકીઓની ધરપકડ કરી
- બંન્ને આરોપીઓના આતંકી સંગઠનો સાથે સંબંધ હોવાની આશંકા
પ્રજાસત્તાક દિવસની ઉજવણી પહેલા દિલ્હી પોલીસની સ્પેશિયલ સેલે આતંકવાદી ષડયંત્રનો પર્દાફાશ કરી દીધો છે. 26 જાન્યુઆરી પહેલાં દિલ્હીના સ્પેશિયલ સેલે 2 આતંકીઓની ધરપકડ કરી લીધી છે. ધરપકડ કરાયેલા બંને આરોપીઓના આતંકવાદી સંગઠન સાથે સંબંધ હોવાની આશંકા છે. આરોપીઓ ટાર્ગેટ બનાવવાની યોજના બનાવી રહ્યાં હોવાનું સૂત્રો તરફથી જાણવા મળ્યું હતું. દિલ્હીના સ્પેશિયલ સેલે જહાંગીરપુરીથી ધરપકડ કરેલા બે આતંકીઓના પગેરું ભાલવા ડેરીમાં સ્થિત એક ઘરમાંથી બે હેન્ડ ગ્રેનેડ અને કેટલીક વાંધાજનક સામગ્રી મળી આવી છે.
બંનેને 14 દિવસની પોલીસ કસ્ટડીમાં મોકલવામાં આવ્યા
દરોડા બાદ પોલીસે આરોપી નૌશાદ (56) અને જગજીત સિંહ (29) ની ગેરકાનૂની પ્રવૃત્તિઓ (પ્રિવેન્શન) એક્ટ (UAPA) હેઠળ ધરપકડ કરી હતી. બંનેને 14 દિવસની પોલીસ કસ્ટડીમાં મોકલવામાં આવ્યા હતા. તપાસ દરમિયાન, આરોપીઓ પોલીસ ટીમને શ્રદ્ધા નંદ કોલોની, થાણા ભલસ્વા ડેરી ખાતેના તેમના ભાડાના આવાસમાં લઈ ગયા હતા.
પોલીસ સૂત્રોએ જણાવ્યું હતું કે જગજીત અને નૌશાદે ભલસ્વા ડેરીના એક મકાનમાં કોઈની હત્યા કરી નાખી હતી. આ ઘટનાને અંજામ આપવા દરમિયાન બંનેએ એક વીડિયો પણ બનાવ્યો હતો અને તેને પોતાના હેન્ડલરને મોકલ્યો હતો. દિલ્હી પોલીસની તપાસમાં એ પણ સામે આવ્યું છે કે જગજીત સિંહ ખાલિસ્તાની આતંકવાદી અર્શદીપ સિંહ ગિલ ઉર્ફે અર્શના સંપર્કમાં હતો અને તે અન્ય દેશોના રાષ્ટ્ર વિરોધી તત્વો પાસેથી સૂચના મેળવતો હતો. ગિલને સરકારે આતંકવાદી જાહેર કર્યો હતો. તે પંજાબમાં ટાર્ગેટ કિલિંગ, ટેરર ફંડિંગ અને ખંડણીમાં સામેલ છે.
નૌશાદને પહેલાં પણ સજા થઇ ચૂકી છે
નૌશાદ આતંકી સંગઠન હરકત-ઉલ-અંસાર સાથે સંકળાયેલો હતો અને ડબલ મર્ડર કેસમાં સજા કાપીને તે જેલમાંથી બહાર આવ્યો હતો. નૌશાદ બે હત્યા અને વિસ્ફોટકો રાખવા માટે અગાઉ 10 વર્ષની સજા પણ ભોગવી ચૂક્યો છે.
