ક્રિકેટ / ૨૩ વર્ષ બાદ કરાયેલા ફેરફારથી વર્લ્ડકપની મજા બેવડાઈ જશે

આગામી વર્લ્ડકપ ૩૦ મેથી ઈંગ્લેન્ડમાં શરૂ થઈ રહ્યો છે. વિશ્વકપ ફરી એક વાર પોતાના અસલી અંદાજમાં પાછો ફર્યો છે અને રાઉન્ડ રોબિન  અને નોકઆઉટ ફોર્મેટમાં રમાશે. ફરી એક વાર આ ફોર્મેટને કારણે વિશ્વકપની મજા બેવડાઈ  જશે. વર્ષ ૧૯૭૫માં વિશ્વકપની શરૂઆત આ ફોર્મેટ સાથે જ થઈ હતી અને સતત છ વિશ્વકપ આ જ ફોર્મેટ પ્રમાણે રમાતા રહ્યા. છેલ્લે વર્ષ ૧૯૯૬માં વિશ્વકપ રાઉન્ડ રોબિન અને નોકઆઉટ ફોર્મેટમાં રમાયો હતો. હવે ૨૩ વર્ષ બાદ વિશ્વકપમાં આ ફોર્મેટની વાપસી થઈ છે. ભારતે પહેલી વાર ૧૯૮૩માં પોતાનો પ્રથમ વિશ્વકપ આ જ ફોર્મેટમાં જીત્યો હતો. આમ ૨૩ વર્ષ બાદ ફરી એક વાર આઇસીસીએ આ ફોર્મ્યુલામાં પોતાનો વિશ્વાસ વ્યક્ત કર્યો છે. આ ફોર્મેટ ઘણું મજેદાર છે, કારણ કે ટૂર્નામેન્ટમાં ભાગ લઈ રહેલી બધી ટીમવચ્ચે જોરદાર મુકાબલો જોવા મળશે.

આ ફોર્મેટમાં બધી ટીમ એકબીજા સામે રમે છે. આ વિશ્વકપમાં કુલ ૧૦ ટીમ ભાગ લઈ રહી છે. આ વખતે કુલ ૪૫ લીગ રમાશે અને ત્યાર બાદ પોઇન્ટ ટેબલ પર ટોચના સ્થાને રહેલી ચાર ટીમ સેમિફાઇનલમાં પહોંચશે. સેમિફાઇનલમાં પહોંચનારીE ટોચની ચાર ટીમમાં પ્રથમ સ્થાને રહેલી ટીમની મેચ ચોથા નંબર પર રહેલી ટીમ સામે રમાશે, જ્યારે બીજા નંબરની ટીમનો મુકાબલો ત્રીજા સ્થાને રહેલી ટીમ સામે થશે.

આ વખતે દરેક ટીમ સામે સેમિફાઇનલમાં પહોંચવાની બરોબર તક રહેશે. આઇસીસી રેન્કિંગમાં આઠ નંબર સુધી આવનારી ટીમને વિશ્વકપમાં સીધો પ્રવેશ મળ્યો છે, જ્યારે બે ટીમે ક્વોલિફાઇંગ મેચ દ્વારા  વિશ્વકપમાં એન્ટ્રી મેળવી છે. જોકે કેટલીક ટીમ વિશ્વકપની પ્રબળ દાવેદાર છે, પરંતુ જો વિન્ડીઝ, બાંગ્લાદેશ અને અફઘાનિસ્તાન જેવી ટીમનો દિવસ હોય તો તેઓ કોઈ પણ ટીમને ચોંકાવી શકે છે. 

કયા ફોર્મેટમાં રમાયા વિશ્વકપ?
•    ૧૯૭૫ પ્રથમ વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૭૯ બીજો વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૮૩ ત્રીજો વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૮૭ ચોથો વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૯૨ પાંચમો વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૯૬ છઠ્ઠો વિશ્વકપઃ રાઉન્ડ રોબિન અને નોકઆઉટ ફોર્મેટ.
•    ૧૯૯૯ સાતમો વિશ્વકપઃ ગ્રૂપ એન્ડ સુપર સિક્સ ફોર્મેટ.
•    ૨૦૦૩ આઠમો વિશ્વકપઃ ગ્રૂપ એન્ડ સુપર સિક્સ ફોર્મેટ.
•    ૨૦૦૭ નવમો વિશ્વકપઃ ગ્રૂપ સ્ટેન્જ એન્ડ નોકઆઉટ ફોર્મેટ.
•    ૨૦૧૧ દસમો વિશ્વકપઃ ગ્રૂપ સ્ટેન્જ એન્ડ નોકઆઉટ ફોર્મેટ.
•    ૨૦૧૫ અગિયારમો વિશ્વકપઃ ગ્રૂપ સ્ટેન્જ એન્ડ નોકઆઉટ ફોર્મેટ.