- ઉત્તરાખંડ હાઈકોર્ટના જસ્ટિસ શરદ કુમાર શર્માની મહત્વપૂર્ણ ટિપ્પણી
- મહિલાઓ કાયદાનો દુરુપયોગ કરી રહી છે: ઉત્તરાખંડ હાઈકોર્ટ
- પાર્ટનર વિરુદ્ધ એન્ટિ રેપ કાયદાનો દુરુપયોગ કરી રહી છે મહિલાઓ: હાઇકોર્ટ
ઉત્તરાખંડ હાઈકોર્ટે કહ્યું છે કે, આજકાલ મહિલાઓ જ્યારે તેમના પુરૂષ પાર્ટનર સાથે મતભેદો હોય ત્યારે બળાત્કારને એક હથિયાર તરીકે સજા આપતા કાયદાનો દુરુપયોગ કરી રહી છે. જસ્ટિસ શરદ કુમાર શર્માએ 5 જુલાઈના રોજ એક વ્યક્તિ વિરુદ્ધ ફોજદારી કાર્યવાહીને રદ કરતી વખતે આ ટિપ્પણી કરી હતી, જેના પર એક મહિલાએ તેની સાથે લગ્ન કરવાનો ઇનકાર કર્યા પછી બળાત્કારનો આરોપ મૂક્યો હતો. બંને વચ્ચે 2005થી સહમતિથી સંબંધ હતો.
મહિલાઓ કાયદાનો દુરુપયોગ કરી રહી છે
ઉત્તરાખંડ હાઈકોર્ટના જસ્ટિસ શર્માએ કહ્યું કે, સુપ્રીમ કોર્ટે પણ વારંવાર પુનરોચ્ચાર કર્યો છે કે, પુખ્ત વયના લોકો વચ્ચે સહમતિથી બનેલા શારીરિક સંબંધને બળાત્કાર ન કહી શકાય જો બંને પક્ષે લગ્ન કરવાનો ઇનકાર કર્યો હોય. એક મહત્વપૂર્ણ ટિપ્પણીમાં ઉત્તરાખંડ હાઈકોર્ટે જણાવ્યું હતું કે, મહિલાઓ તેમના પુરૂષ ભાગીદારો વિરુદ્ધ વિખવાદ સહિત વિવિધ કારણોસર ભારતીય દંડ સંહિતાની કલમ 376 નો દુરુપયોગ કરી રહી છે.
આરોપી અને મહિલા 2005થી રિલેશનશિપમાં હતા
મહિલાએ 30 જૂન, 2020ના રોજ ફરિયાદ નોંધાવી હતી કે, આરોપી 2005થી તેની સાથે સહમતિથી સેક્સ કરી રહ્યો હતો. તેણીએ કહ્યું કે, બંનેએ એકબીજાને વચન આપ્યું હતું કે તેમાંથી એકને નોકરી મળતાં જ તેઓ લગ્ન કરી લેશે. પરંતુ બાદમાં આરોપીએ બીજી મહિલા સાથે લગ્ન કર્યા અને તે પછી પણ તેમનો સંબંધ ચાલુ રહ્યો એવો દાવો કરવામાં આવ્યો હતો.
હાઈકોર્ટની મહત્વની ટિપ્પણી
હાઈકોર્ટે કહ્યું, 'મહિલા જાણતી હતી કે તે જેની સાથે રિલેશનશિપમાં હતી તે પહેલાથી જ પરિણીત છે, તેમ છતાં તેણે સ્વેચ્છાએ તેમના સંબંધો ચાલુ રાખ્યા. આવી સ્થિતિમાં સંમતિ આપોઆપ અમલમાં આવે છે. કોર્ટે કહ્યું કે, પરસ્પર સંમતિથી સંબંધમાં પ્રવેશ કરતી વખતે લગ્નની ખાતરીની સત્યતા પ્રારંભિક તબક્કે તપાસવી જોઈએ અને પછીના તબક્કે નહીં. હાઈકોર્ટે કહ્યું કે, જ્યારે સંબંધ 15 વર્ષ સુધી ચાલ્યો હોય અને આરોપીના લગ્ન પછી પણ ચાલુ રહ્યો હોય ત્યારે પ્રારંભિક તબક્કાને ધ્યાનમાં લઈ શકાય નહીં.
