ક્રાઇમ'નગરી'! / સુરત ફરી રક્તરંજિતઃ ઘરમાં ઘુસીને મહિલાનું ગળું કાપી કરાઈ હત્યા, હત્યારો ફરાર, પોલીસ કાફલો ઘટનાસ્થળે

• સુરતમાં કાપોદ્રામાં હત્યાનો બનાવ
• મહિલા ના ઘરમાં ઘુસી ગળું કાપી હત્યારો ફરાર
• પોલીસે ઘટના સ્થળે પહોંચી તપાસ હાથ ધરી

સુરત ફરી રક્તરંજિત થયું છે. હત્યા ચોરી લૂટફાટના બનાવો ધોળા દિવસે થઈ રહી છે. સુરતમાં કાપોદ્રામાં ચકચાર મચાવતી ઘટના સામે આવી છે. જેમાં એક મહિલાનું ગળું કાપી હત્યા કરી હોવાનું સામે આવતાં સમગ્ર વિસ્તારમાં અરેરાટી ફેલાઈ છે. 

અજાણ્યા શખ્સે એક મહિલાનું ગળું કાપી ઢીમ ઢાળી દીધું
સુરતમાં કાપોદ્રાની ગૌતમ પાર્ક સોસાયટીમાં એક મહિલાનું ગળું કાપી મોતને ઘાટ ઉતારી દેવામાં આવી છે. ઘટના સ્થળ પર હાજર લોકોનું માનીએ તો અજાણ્યો શખ્સ મહિલા ના ઘરમાં ઘૂસી ગયો હતો. જે બાદ ઘાતકી રીતે મહિલાની હત્યા કરી હત્યારો ફરાર થઈ ગયો હતો. બનાવ અંગેની પોલીસને જાણ કરવામાં આવતા મોટી સંખ્યામાં કાપોદ્રા પોલીસનો કાફલો ઘટના સ્થળે પહોંચ્યો હતો.

સોસાયટીના લોકોમાં ડર, પોલીસ તપાસમાં લાગી
હત્યાના બનાવની જાણ થતાં સોસાયટીના લોકો મોટી સંખ્યામાં ભેગા થઈ ગયા હતા. પોલીસ પણ મર્ડર મિસ્ટ્રીની તપાસમાં જોતરાઈ ગઈ છે. ઘરમાંથી મહિલાનો મૃતદેહ કાઢી હાલ પીએમ અર્થે હોસ્પિટલમાં ખસેડવામાં આવ્યો છે. ફોરેન્સિકની ટીમ બોલાવી હત્યાના સબૂત એકઠા કરવાની કામગીરી પણ પોલીસ દ્વારા કરવામાં આવી છે. સોસાયટીના લોકોના નિવેદન પણ લેવાઈ રહ્યા છે તેમજ સીસીટીવી પણ પોલીસ ખંગોળી રહી છે. હજુ સુધી મહિલાની હત્યા શા કારણે કારણે કરવામાં આવી તેની કોઈ વિગત સામે આવી નથી પણ હત્યારા આરોપીને પકડવા પોલીસે ચક્રો ગતિમાન કરી દીધા છે.

સુરત ક્રાઈમ કેપિટલ બન્યું
સુરતમાં બદમાશો અને અસમાજીક તત્વોમાંથી પોલીસનો ડર ગાયબ થઈ ગયો છે. એક તરફ જ્યાં ગૃહરાજ્ય મંત્રી પોલીસની છબી સુધારવાનો પ્રયત્ન કરે છે. ગુજરાત પોલીસ ક્રાઇમને રોકવા માટે પોલીસ સજ્જ હોવાનો દાવો કરે છે ત્યારે ગૃહમંત્રીનું શહેર જ ક્રાઇમ કેપિટલ બની રહ્યું છે.  શહેરમાં શાંતિ અને સુરક્ષા જળવાય તેનું ધ્યાન રાખતી પોલીસ સુરતમાં ક્રાઇમ રોકવામાં નિષ્ફળ નીવડી છે.