ક્યારે મળી શકે / પત્ની પતિ કરતાં વધારે કમાતી હોય તો ભરણપોષણની હકદાર નહીં, કોર્ટનો મોટો ચુકાદો

• ભરણપોષણને લઈને મુંબઈ સેશન્સ કોર્ટનો મહત્વનો ચુકાદો
• પતિ કરતાં વધારે કમાતી પત્નીને નિર્વાહ ભથ્થું ન મળી શકે
• બાળકને મળી શકે, પણ પત્નીને અલગથી ન  મળી શકે
• આ કેસમાં પત્ની પતિ કરતાં ચાર લાખ વધુ કમાય છે 

પતિ-પત્નીના અલગ થયા બાદ ભરણપોષણને લઈને મુંબઈની સેશન્સ કોર્ટે મોટો નિર્ણય આપ્યો છે. ટ્રાયલ કોર્ટનો ચુકાદા પર મંજૂરીની મહોર મારતાં સેશન્સ કોર્ટે કહ્યું કે આ કિસ્સામાં પત્ની તેના ભૂતપૂર્વ પતિ કરતા વધારે કમાય છે અને તેથી તેને ભરણપોષણ નહીં મળે.

પતિ કરતાં ઓછું કમાતી હોય તેવા કિસ્સામાં પત્ની ભરણપોષણનો દાવો કરી શકે 
ટ્રાયલ કોર્ટના આદેશ બાદ મહિલાએ સેશન્સ કોર્ટમાં અરજી દાખલ કરી હતી. કોર્ટે કહ્યું કે, એ વાત સાચી છે કે કમાતી મહિલાને ભરણપોષણ પણ મળવું જોઈએ, પરંતુ આ કિસ્સામાં સંજોગોને જોવા ખૂબ જ જરૂરી છે. જો મહિલા પોતાના એક્સ હસબન્ડથી વધુ કમાતી હોય તો તેને ભરણપોષણની જરૂર નથી પડતી. સાથે જ જો પતિ વધુ કમાતો હોય તો સંજોગો તરફ પણ ધ્યાન આપવું જરૂરી છે.

પહેલા બાળકને મળી રહ્યું છે 10,000નું ભરણપોષણ 
જસ્ટિસ સીવી પાટિલે કહ્યું, "આ કેસમાં મેજિસ્ટ્રેટ કોર્ટે જે નિર્ણય લીધો છે તે યોગ્ય છે. મહિલાએ 2021માં સાસરિયાઓ સામે ઘરેલુ હિંસાનો કેસ દાખલ કર્યો હતો. તેણે જણાવ્યું કે બાળકના જન્મ બાદ તેને બળજબરીથી તેના માતા-પિતાના ઘરે મોકલી દેવામાં આવી હતી. આ પછી, કોર્ટે પતિને દર મહિને 10 હજાર રુપિયાનું ભરણપોષણ આપવાનો આદેશ કર્યો હતો જેથી બાળકનો ઉછેર થઈ શકે. મહિલાએ કોર્ટમાં એમ પણ કહ્યું હતું કે તેના પતિની સારવાર ચાલી રહી છે. તેના પરિવારે જ કહ્યું હતુ કે તે પિતા નહીં બની શકે. મહિલાએ આરોપ લગાવ્યો હતો કે જ્યારે તે ગર્ભવતી થઈ ત્યારે તેના સાસરિયાઓએ તેના પર શંકા કરવાનું શરૂ કરી દીધું હતું. ચરિત્ર પર આક્ષેપો કરાયા હતા. 

બીજા બાળકનો પિતા નથી- પતિની દલીલ 
આ કેસમાં કોર્ટે ફાઈનલ ચુકાદો આપતાં કહ્યું કે બાળક માટે ભથ્થું આપવું યોગ્ય છે પરંતુ મહિલા માટે નહીં. મહિલાને બાળક માટે અલગથી ભરણપોષણ મળતું હતું અને પોતાનું ભરણપોષણ અલગ મળતું હતું, પરંતુ કોર્ટે અલગથી ભરણપોષણ આપવાની અરજી ફગાવી દીધી હતી. તો બીજી તરફ બીજા બાળકને લઈને પતિએ કહ્યું હતું કે તે તેનો પિતા નથી.