ધર્મ / ભગવાન શ્રીવિષ્ણુના પગ કેમ દબાવતા રહે છે મા લક્ષ્મી? ધનલાભ સાથે જોડાયેલ છે રહસ્ય, જાણો બે પ્રચલિત કથાઓ

• લક્ષ્મી માતા સમસ્ત સુખ પ્રદાન કરે છે
• લક્ષ્મી માતા વિષ્ણુ ભગવાનના ચરણોની પાસે બેસે છે
• લક્ષ્મી માતા ધનના દેવી હોવા છતાં વિષ્ણુજીના ચરણ શા માટે દબાવે છે? 

ભગવાન શ્રી હરિ સૃષ્ટીના પાલનહાર છે અને લક્ષ્મી માતા સમસ્ત સુખ પ્રદાન કરે છે. દિવાળીમાં ધન, સુખ, ઐશ્વર્ય અને સમૃદ્ધિના દેવી લક્ષ્મી માતાની પૂજા કરવામાં આવે છે. આ વર્ષે 12 નવેમ્બરે દિવાળી છે. આપણે અનેક ફોટોઝમાં જોયું છે કે, લક્ષ્મી માતા વિષ્ણુ ભગવાનના ચરણોની પાસે બેસે છે. શું તમને ક્યારેય વિચાર આવ્યો છે કે, લક્ષ્મી માતા ધનના દેવી હોવા છતાં વિષ્ણુજીના ચરણ શા માટે દબાવે છે? 

લક્ષ્મી માતા વિષ્ણુજીના ચરણ શા માટે દબાવે છે??
પૌરાણિક કથા અનુસાર નારદજીએ લક્ષ્મી માતાને પૂછ્યું હતું કે,  તમે શ્રીહરિના ચરણ શા માટે દબાવો છો? તે સમયે લક્ષ્મી માતાએ કહ્યું હતું કે, મનુષ્ય હોય કે દેવતા તમામ લોકો પર ગ્રહની સમાન અસર થાય છે. સ્ત્રીઓના હાથમાં દેવગુરુ નિવાસ કરે છે, પુરુષોના પગમાં દૈત્યગુરુ શુક્રાચાર્ય નિવાસ કરે છે. આ કારણોસર સ્ત્રી પુરુષના ચરણ સ્પર્શ કરે છે, ત્યારે દેવ અને દાનવનું મિલન થાય છે. જેના કારણે નાણાંકીય લાભ થાય છે. આ કારણસર લક્ષ્મી માતા શ્રીહરિના ચરણ દબાવે છે. 

અન્ય કથા
અન્ય કથા અનુસાર, અલક્ષ્મીને તેની મોટી બહેન માઁ લક્ષ્મીની સુંદરતાથી ખૂબ જ ઈર્ષ્યા થતી હતી. અલક્ષ્મી તેટલી આકર્ષક ન હતી. લક્ષ્મી દેવી ભગવાન વિષ્ણુની સાથે હોય ત્યારે અલક્ષ્મી ત્યાં પહોંચી જતી. લક્ષ્મીજીને આ વાત પસંદ નહોતી. અલક્ષ્મીએ કહ્યું કે, કોઈ તેની પૂજા કરતું નથી. આ કારણોસર લક્ષ્મીજી જ્યાં પણ જશે, ત્યાં અલક્ષ્મી પણ તેમની સાથે આવશે. જેથી લક્ષ્મી માતાએ ક્રોધિત થઈને તેમની બહેન અલક્ષ્મીને શ્રાપ આપ્યો કે, જ્યાં ઈર્ષ્યા, લોભ, આળસ, ક્રોધ અને મલિનતા હશે ત્યાં તેનો વાસ થશે. આ કારણોસર લક્ષ્મી માતા હંમેશા પતિ ભગવાન શ્રીહરિના પગની ગંદકી દૂર કરતી રહે છે જેથી અલક્ષ્મી તેમની નજીક ન આવી શકે.