રાજ્યમાં હાલ ચોમાસાની ઋતુને લઈને તંત્રના ચોપડે સરેરાશ 83 ટકા વરસાદ નોંધાયો છે. તેવામાં હજુ ૨૪ કલાક વરસાદી વાતાવરણ રહે તેવું હવામાન વિભાગ દ્વારા જણાવાયું છે.
Share
રાજ્યમાં 24 કલાક વરસાદી માહોલ રહેશે
24 કલાક બાદ વરસાદનું જોર ઘટશે
અમદાવાદ ગાંધીનગરમાં સામાન્ય વરસાદની આગાહીઃ હવામાન વિભાગ
ચાલુ વર્ષે ચોમાસાની ધમાકેદાર શરૂઆત થયા બાદ મેઘરાજા સટાસટી બોલાવી રહ્યા છે. હવામાન વિભાગની આગાહી મુજબ મોટાભાગના વિસ્તારોમાં જળબંબાકાર સર્જાયો છે. તેવામાં હવામાન વિભાગ દ્વારા વરસાદને લઇને વધુ એક આગાહી કરવામાં આવી છે. જેમાં જણાવાયા અનુસાર રાજ્યમાં આગામી 24 કલાક સુધી વરસાદી માહોલ જોવા મળશે. જોકે આ દરમિયાન અતિ ભારે વરસાદ પડે તેવી સંભાવના નહિવત જોવા મળી રહી છે. અમુક વિસ્તારોને બાદ કરતા છૂટો છવાયો વરસાદ નોંધાઇ શકે છે. જોકે 24 કલાક બાદ વરસાદનું જોર ઘટશે.
ભાવનગર, અમેરેલીમાં વરસાદની આગાહીઃ હવામાન વિભાગ
હવામાન વિભાગના ડાયરેક્ટર મનોરમા મોહન્તીના જણાવાયા અનુસાર કચ્છ, બનાસકાંઠા અને પાટણમાં ભારે વરસાદ પડે તેવા અણસાર જોવા મળી રહ્યા છે. તો સુરત, ભરૂચ, વલસાડમાં પણ વરસાદની શકયતા સેવાઇ રહી છે. ઉપરાંત ભાવનગર, અમરેલીમાં પણ મેઘમહેરની આગાહી કરવામાં આવી છે. બીજી બાજુ અમદાવાદ ગાંધીનગરમાં સામાન્ય વરસાદ પડી શકે છે.આવતીકાલથી ભારે વરસાદની સંભાવના ખૂબ જ ઓછી હોવાનું પણ જણાવ્યું હતું. જેથી હવે વરાપ નીકળે તેવા સંજોગો જોવા મળી રહ્યા છે.
રાજ્યમાં હાલ સુધી 83 ટકા વરસાદ નોંધાયો
આ ઉપરાંત વારસદુ સ્થિતિને લઈને આગામી 5 દિવસ માછીમારોને દરિયો ન ખેડવા પણ સૂચના આપી દેવામાં આવી છે. રાજ્યમાં હાલ સરેરાશ 83 ટકા વરસાદ નોંધાયો છે. સૌરાષ્ટ્રમાં સિઝનના વરસાદ કરતાં 20 ટકા વધુ વરસાદ પડી ચુક્યો હોવાનો પણ ઉલ્લેખ કરાયો છે.નોંધનીય છે કે રાજ્યમાં અવિરત વરસાદ વરસી રહ્યો છે. જેથી કેટલાક જિલ્લાઓમાં ખેડુતોને નુકસાન પણ થયું છે. અતિવૃષ્ટિથી લીલા દુકાળના ભણકારા વાગી રહ્યા છે. ત્યારે આગોતરા વાવેતર નિષ્ફળ જાય તેવા સમાચાર પણ મળી રહ્યા છે.
