બિઝનેસ / હવે TV જોવું પણ મોંઘું: સિરિયલથી લઈને ક્રિકેટ મેચની ચેનલોના વધી ગયા ભાવ, જાણો કેટલું વધશે બિલ

• હવે TV જોવું પણ મોંઘું થઈ જશે
• બ્રોડકાસ્ટર્સે ટીવી ચેનલની કિંમતોમાં વધારો કર્યો
• TRAI રેટ કાર્ડ પર સતત નજર રાખી રહ્યું છે

ઝી એન્ટરટેઈનમેન્ટ એન્ટરપ્રાઈઝ, સોની પિક્ચર્સ નેટવર્ક્સ ઈન્ડિયા અને વાયાકોમ 18 તથા અન્ય બ્રોડકાસ્ટર્સે ટીવી ચેનલની કિંમતોમાં વધારો કર્યો છે. વાયાકોમ18ની ઈંડિયાકાસ્ટે ચેનલ્સની કિંમતમાં 20-25 ટકાનો વધારો કર્યો છે અને ઝી એન્ટરટેઈનમેન્ટે 10 ટકાનો વધારો કર્યો છે. સોનીએ 10-11 ટકાનો વધારો કર્યો છે. તમામ ચેનલોએ પ્રાઈસની જાહેરાત કરી નથી. આ નવી કિંમતો 1 ફેબ્રુઆરીથી લાગુ થશે. REO પબ્લિકેશનના 30 દિવસ પછી નવી કિંમત લાગુ કરવામાં આવશે. TRAI રેટ કાર્ડ પર સતત નજર રાખી રહ્યું છે. 

સૌથી વધુ કિંમત
TRAIએ NTO 3.0 લાગુ કરતા બ્રોડકાસ્ટર્સે કિંમતોમાં બીજી વાર વધારો કર્યો છે. ફેબ્રુઆરી 2023 પહેલા ટીવી ચેનલની કિંમત 3 વર્ષ સુધી સ્થિર હતી. બ્રોડકાસ્ટર્સ અને કેબલ ટીવી કંપનીઓ વચ્ચે વિવાદ થયા પછી કિંમતો વધારવામાં આવી, જેના કારણે બ્રોડકાસ્ટર્સે કેબલ ટીવી ઓપરેટર્સ માટે ટીવી સિગ્નલ બંધ કરી દીધા. 

બ્રોડકાસ્ટર્સે ચેનલો માટે લિસ્ટ અને બુકે કિંમતની જાહેરાત કરવાની રહે છે. મોટાભાગના ગ્રાહક સસ્તા બુકેની પસંદગી કરે છે. વાયાકોમ 18 પાસે સ્પોર્ટ્સ રાઈટ્સ હોવાને કારણે કિંમતમાં વધારો કરવામાં આવ્યો છે. વાયાકોમ 18 પાસે IPL, ડિજિટલ રાઈટ્સ, BCCI મીડિયા રાઈટ્સ, ક્રિકેટ સાઉથ આફ્રિકા મીડિયા રાઈટ્સ અને ઓલિમ્પિક 2024 શામેલ છે. 

ડિઝ્ની કિંમતમાં કરશે વધારો
ડિઝ્નીએ 3 બિલિયન ડોલરમાં ICC મીડાયા રાઈટ્સ ખરીદ્યા છે. ડિઝ્નીએ હજુ સુધી પ્રાઈસની જાહેરાત કરી નથી, BCCI મીડિયા રાઈટ્સ ગુમાવ્યા પછી ડિઝ્ની સ્ટાર આ બાબતે વિચારણા કરી રહ્યું છે.