- ક્રિકેટર વિરાટ કોહલીનો ડાયમંડથી પોટ્રેટ
- સુરતના આર્ટિસ્ટ દ્વારા બનાવાયું પોટ્રેટ
- ત્રણ કલરના અમેરિકન ડાયમંડ થી આ ચિત્ર તૈયાર કરાયું
કળાને કોઈ મર્યાદા કે ઉંમરના બંધન નડતા નથી. સુરત શહેરના એક આર્ટિસ્ટ દ્વારા ક્રિકેટ રેકોર્ડ બ્રેક એવા વિરાટ કોહલીનો ડાયમંડથી પોટ્રેટ બનાવવામાં આવ્યું છે. આશરે 4 હજાર ડાયમંડ થી આ પોટ્રેટ તૈયાર કરાયું છે. ત્રણ કલરના અમેરિકન ડાયમંડ થી આ ચિત્ર તૈયાર કરવામાં આવ્યું છે.
ક્રિકેટ જગતમાં વિરાટ કોહલીના ચાહકોની કોઈ કમી નથી. વિરાટ કોહલીના સમગ્ર દેશ અને વિદેશમાં અનેક ચાહકો છે. એવું પણ કહી શકાય છે કે સચિન તેંડુલકર બાદ કોહલીનું નામ સૌથી વધુ સન્માન સાથે લેવાય છે. સુરતમાં પણ તેમના અનેક ચાહકો છે. પરંતુ સુરતના કલાકાર વિપુલ જેપિવાલા તેમના અદભુત ચાહક છે અને પોટ્રેટની અદ્દભુત કલા પણ ધરાવે છે. વિપુલભાઈએ વિરાટ કોહલીને ભેટ આપવા માટે હીરાજડિત પોટ્રેટ તૈયાર કર્યું છે.
પોટ્રેટ લોકોને પસંદ આવ્યું છે
હાલમાં જ એશિયા કપ રમાઈ રહ્યો છે. એશિયાકપ માં સૌથી વધુ હાઈ વોલ્ટેજ ગેમ પાકિસ્તાન સામે વિરાટ કોહલીએ તેમની વનડે કરિયરની 47મી સદી ફટકારી હતી. કોહલી દ્વારા 47મી સદી ફટકારતાં સાથે જ વિપુલ ભાઈ દ્વારા તૈયાર કરાયેલા આ પોટ્રેટ નો વિડિયો બનાવી તેમણે વિરાટ કોહલીને શુભેચ્છા આપી હતી. આ વિડિયો સોશિયલ મીડિયામાં વાઇરલ થયો હતો. વિરાટ અન્ય ચાહકોએ આ વીડિયોને ખૂબ બિરદાવ્યો હતો. વાયુવેગે વાયરલ થયેલા આ વીડિયોથી વિપુલ ભાઈને પણ ખુશી મળી હતી કે તેમના દ્વારા તૈયાર કરાયેલું પોટ્રેટ લોકોને પસંદ આવ્યું છે.
4 હજાર જેટલા ડાયમંડનો ઉપયોગ
વિપુલભાઈ દ્વારા આ પોટ્રેટ તૈયાર કરવામાં આવ્યું છે. આ પોટ્રેટ બનાવતા આશરે 2 મહિના જેટલો સમય લાગ્યો છે. આ ચિત્રમાં આશરે 4 હજાર જેટલા ડાયમંડ નો ઉપયોગ કરવામાં આવ્યો છે. આ પોટ્રેટ માં ત્રણ અલગ અલગ શેડના ડાયમંડ નો ઉપયોગ કરવામાં આવ્યો છે. આ પોટ્રેટમાં અમેરિકન ડાયમંડનો ઉપયોગ કરવામાં આવ્યો છે. એક અમેરિકન ડાયમંડની કિંમત આશરે 7થી 8 રૂપિયા જેટલી થાય છે. આ ચિત્રને વિપુલભાઈ જાતે વિરાટ કોહલીને મળીને આપવા માટે ઈચ્છા રાખે છે. વિરાટ કોહલી સાથે જ્યાં પણ મુલાકાત થશે ત્યાં તેમને આ ચિત્ર ભેટ આપવા માંગે છે. આગામી 14મી ઓકટોબરના રોજ ભારત પાકિસ્તાન વચ્ચે અમદાવાદમાં વર્લ્ડ કપની લોગ મેચ રમાવવાની છે ત્યારે પણ જો વિરાટ કોહલીને મળી શકાય તો ત્યારે તેમને તેઓ ભેટ આપવા ઈચ્છે છે.
