- ભારત અને પાકિસ્તાનની ક્રિકેટ ટીમ વિશ્વની બે સૌથી સફળ ટીમોમાંની એક
- એવામાં વિરાટ કોહલીએ પાકિસ્તાનના બેટ્સમેન બાબરના વખાણ કર્યા હતા
- કોહલીએ બાબર આઝમને તમામ ફોર્મેટમાં શ્રેષ્ઠ બેટ્સમેનોમાંના એક ગણાવ્યો
Virat Kohli news: ભારત અને પાકિસ્તાન કટ્ટર હરીફ હોવાની સાથે સાથે જ વિશ્વની બે સૌથી સફળ ક્રિકેટ ટીમોમાંની એક છે. બંને ટીમોએ દુનિયાને ઘણા મોટા ખેલાડીઓ આપ્યા છે. વર્તમાન યુગમાં ભારત પાસે વિરાટ કોહલી જેવા બેટ્સમેન છે. જ્યારે પાકિસ્તાન પાસે બાબર આઝમ છે. વિરાટ કોહલી અત્યારે વિશ્વનો સૌથી મોટો બેટ્સમેન છે. બીજી તરફ બાબરની આઈસીસી રેન્કિંગ ઘણી સારી છે. આ દરમિયાન ભારતના સુપરસ્ટાર બેટ્સમેન વિરાટ કોહલીએ બાબર આઝમને તમામ ફોર્મેટમાં વિશ્વના શ્રેષ્ઠ બેટ્સમેનોમાંના એક ગણાવ્યા છે.
વિરાટ કોહલીએ બાબરના વખાણ કર્યા હતા
કોહલીએ સ્ટાર સ્પોર્ટ્સ સાથેની વાતચીતમાં તેની પ્રશંસા વ્યક્ત કરી અને પાકિસ્તાનના સ્ટાર બેટ્સમેન બાબર આઝમ સાથેની તેની પ્રથમ મુલાકાતને યાદ કરી. કોહલીએ ઈન્ટરવ્યુમાં યાદ કર્યું કે તેની (બાબર) સાથે મારી પ્રથમ વાતચીત 2019 ODI વર્લ્ડ દરમિયાન માન્ચેસ્ટરમાં રમત બાદ થઈ હતી. હું ઈમાદ વસીમને અંડર-19 વર્લ્ડ કપથી ઓળખું છું અને તેણે કહ્યું કે બાબર મારી સાથે વાત કરવા માંગતો હતો.
બાબર તમામ ફોર્મેટમાં ટોચનો બેટ્સમેન છે
કોહલીએ આગળ વાત કરતાં કહ્યું કે, આ પછી અમે બેસીને રમત વિશે વાત કરી. મેં પહેલા દિવસથી જ બાબરમાં ઘણું સન્માન અને ગૌરવ જોયું છે અને તે બદલાયું નથી. એ ફેક્ટ છે કે સંભવતઃ બાબર તમામ ફોર્મેટમાં વિશ્વનો ટોચનો બેટ્સમેન છે અને એ સાચું પણ છે. કોહલીએ વધુમાં કહ્યું કે તે સતત પ્રદર્શન કરનાર છે અને મને હંમેશા તેને રમતા જોવાનું પસંદ છે. બાબર હાલમાં 886 રેટિંગ પોઈન્ટ સાથે ICC ODI બેટિંગ રેન્કિંગમાં નંબર વન ખેલાડી છે. તે જ સમયે કોહલી 705 રેટિંગ પોઈન્ટ સાથે નવમા સ્થાને છે.
પાકિસ્તાની બેટ્સમેન બાબર T20 ઈન્ટરનેશનલ અને ટેસ્ટ રેન્કિંગમાં પણ ટોચના પાંચમાં છે, જે તમામ ફોર્મેટના સુપરસ્ટાર તરીકેની તેની સ્થિતિ દર્શાવે છે. ICC રેન્કિંગના તમામ ફોર્મેટમાં ટોચના પાંચમાં સ્થાન મેળવનાર તે વિશ્વનો એકમાત્ર ખેલાડી છે. એશિયા કપના ગ્રુપ સ્ટેજ દરમિયાન ભારત અને પાકિસ્તાન 2 સપ્ટેમ્બરે કેન્ડીમાં ટકરાશે. આ સિવાય અમદાવાદમાં 14 ઓક્ટોબરે ICC ODI વર્લ્ડ કપમાં બંને ટીમો વચ્ચે શાનદાર મેચ રમાશે. આ દરમિયાન આ બંને ખેલાડીઓ મેદાન પર એકસાથે જોવા મળશે.
