ધજાગરા / રાજકોટમાં ખુલ્લામાં દારૂની મહેફિલનો વીડિયો, દારૂડિયાએ અવળચંડાઇ કરતાં કહ્યું 20માં મોજ, પોલીસ કયા નશામાં?

• દારૂની મહેફિલનો વિડીયો થયો સોશિયલ મિડીયામાં વાયરલ
• દારૂબંધીના ધજાગરા ઉડાવતો વિડીયો થયો વાયરલ.
• કોઠારિયા વિસ્તારમાં ખોખડદડ નદી નજીકનો વિડીયો હોવાનું આવ્યું સામે

ગુજરાતમાં દારૂબંધીના દાવા વચ્ચે બેફામ દારૂ બને છે અને પીવાય પણ છે. આ મામલે છાસવારે અનેક વખત પોલીસ દ્વારા દારૂના મસમોટા જથ્થા ઝડપી પાડવામાં આવે છે. જે દારૂબંધી માત્ર કાગળ પર રહી હોવાની ચાડી ખાઈ રહ્યા છે. આવી સ્થિતિ વચ્ચે અનેક વખતે સોશિયલ મીડિયામાં પણ વીડિયો વાયરલ થઈ રહ્યા છે. ત્યારે આવો જ એક વીડિયો રાજકોટમાં વાયરલ થયો છે. જેમાં પોલીસની આબરૂ ધૂળધાણી થઈ રહી છે. રાજકોટના રહેણાક વિસ્તરામાં ખુલ્લેઆમ દેશી દારૂનું વેચાણ થતું હોવાનું વીડિયોમાં દ્રશ્યમાન થતા લોકોમાં પોલીસની કામગીરી સામે સવાલો ઉઠી રહ્યા છે.

ખુલ્લા પટ્ટમાં જામી હતી દારૂની મહેફિલ

રાજકોટમાં દારૂની મહેફિલનો વીડિયો સોશિયલ મિડીયામાં વાયરલ થઈ રહ્યો છે. દારૂબંધીના ધજાગરા ઉડાવતો આ વીડિયો કોઠારિયા વિસ્તારમાં ખોખડદડ નદી નજીકનો હોવાનું જાણવા મળી રહ્યું છે. જ્યા દેશી દારૂ ખુલ્લેઆમ વેંચાતો હતો અને બંધાણીઓ બેફામ દારૂ પીતા પણ હતા. ખાસ વાત તો એ છે કે કડક કાર્યવાહીના દાવા કરતી પોલીસની દારૂ વેંચવા વાળાને કે પીવા વાળાને જાણે કોઈ ડર જ ન હોય તે વીડિયોમાં દ્રશ્યમાન થઈ રહ્યું છે. મહત્વનું છે કે દારૂ અંગે પોલીસની કામગીરી સામે સવાલો ઉભા કરતા અનેક વીડિયો ભૂતકાળમાં પણ સામે આવ્યા છે.