- 150 યુવતીઓને ફસાવનાર આરોપીની ધરપકડ
- વડોદરા સાયબર ક્રાઈમે ભોપાલથી ઠગને ઝડપી પાડ્યો
- મેટ્રોમોનિયલ સાઈટ પર મુકતો હતો બોગસ બાયોડેટા
- બોગસ બાયોડેટા મૂકી યુવતીઓને ફસાવતો હતો ઠગ
Vadodara News: વડોદરા સાયબર ક્રાઈમની ટીમે 150 જેટલી યુવતીઓને અલગ-અલગ નામથી ફસાવનાર આરોપીને ભોપાલથી ઝડપી પાડ્યો છે. આ ઠગે યુવતીઓેને IPS ઓફિસર, ડોક્ટર, ડાયમંડ કિંગ, ઉદ્યોગપતિની ઓળખ આપી પોતાની જાળમાં ફસાવી હતી. હાલ આ ઠગને કોર્ટમાં રજૂ કરી 5 દિવસના રિમાન્ડ મેળવવામાં આવ્યા છે.
જીવનસાથી ડોટ કોમ પરથી કર્યો હતો સંપર્ક
પ્રાપ્ત વિગતો અનુસાર, વડોદરાની એક યુવતીએ સાયબર ક્રાઈમમાં ફરિયાદ નોંધાવી હતી. ફરિયાદમાં યુવતીએ જણાવ્યું હતું કે તેણે જીવનસાથી ડોટ કોમ ઉપર તેનો બાયોડેટા અપલોડ કર્યો હતો. જીવનસાથી ડોટ કોમમાંથી તેનો બાયોડેટા મેળવીને એક યુવકે તેનો સંપર્ક કર્યો હતો અને તેણે પોતાનું નામ અનુપમ શર્મા જણાવ્યું હતું. આ યુવકે પોતે વેલ સેટ હોવાનું કહીને વાતચીત આગળ વધારી હતી. યુવતીને વિશ્વાસમાં લીધા બાદ તેણે તેના ન્યૂડ ફોટા અને વીડિયો ઉતારી લીધા હતા.
બે વર્ષમાં પડાવ્યા લાખો રૂપિયા
જે બાદ આ યુવકે બે વર્ષના સમયગાળામાં 12 લાખથી વધુ રૂપિયા યુવતી પાસેથી પડાવ્યા હતા. આટલા રૂપિયા પડાવ્યા છતાં આ યુવકે ધાકધમકી આપીને પોતાની માંગણી ચાલુ રાખી હતી, જેથી આખરે કંટાળીને યુવતીએ વડોદરા સાયબર ક્રાઈમને સમગ્ર ઘટનાની જાણ કરી હતી. જેથી સાયબર ક્રાઈમની ટીમે યુવતીની ફરિયાદના આધારે તપાસનો ધમધમાટ શરૂ કર્યો હતો.
ભોપાલથી કરી ધરપકડ
સાયબર સેલે યુવકના સોશિયલ મીડિયાના એકાઉન્ટ અને બેંક એકાઉન્ટની તપાસ શરૂ કરાવી હતી. જેમાં તેનું લોકેશન ભોપાલમાં મળતા સાયબર ક્રાઈમની ટીમ ભોપાલ પહોંચી હતી, ભોપાલના હુજુર ખાતેથી આ યુવકને ઝડપી પાડ્યો હતો. જેનું અસલી નામ રોહિત સિંગ હોવાનું જણાવા મળ્યું હતું.
પૂછપરછમાં થયો ખુલાસો
જે બાદ પોલીસ દ્વારા તેની આકરી પૂછપરછ કરવામાં આવતા તેણે અલગ અલગ સાઇટ પરથી ઘણી છોકરીઓને ફસાવી હોવાનું કબૂલ્યું હતું. તે જુદી-જુદી સાઈટમાં પોતાના બોગસ બાયોડેટા મૂકતો હતો. બાયોડેટામાં તે પોતાને ડોક્ટર, ડાયમંડ કિંગ અને ફેક્ટરી માલિક જણાવતો હતો અને યુવતીને પોતી જાળમાં ફસાવતો હતો.
150 જેટલી છોકરીઓને ફસાવી
તે યુવતીઓને પોતાની પર્સનલ સેક્રેટરી તરીકે નોકરીની લાલચ આપતો હતો, ઠગ રોહિત સિંગ યુવતીઓને સારી નોકરીની ઓફર પણ આપતો હતો. પોલીસની પ્રાથમિક તપાસમાં તેણે અત્યાર સુધીમા 150 જેટલી છોકરીઓને ફસાવી હોવાનું સામે આવ્યું છે.
