- યુગાન્ડા T20 વર્લ્ડ કપ 2024 માટે ક્વોલિફાય થયું
- ક્વોલિફાયરમાં રવાન્ડા સામે 9-વિકેટથી જીત મેળવી
- ઝિમ્બાબ્વેનું સપનું ચકનાચૂર થતા થયું બહાર
યુગાન્ડાએ ICC મેન્સ T20 વર્લ્ડ કપ આફ્રિકા રિજન ક્વોલિફાયરમાં રવાન્ડા સામે 9-વિકેટથી જીત નોંધાવ્યા બાદ અમેરિકા-વેસ્ટ ઈન્ડિઝની ટિકિટ મેળવી લીધી. T20 વર્લ્ડ કપ 2024 આવતા વર્ષે જૂનમાં અમેરિકા અને વેસ્ટ ઈન્ડિઝમાં યોજાનાર છે. નામિબિયાએ પહેલાથી જ ICC મેન્સ ટી20 વર્લ્ડ કપ આફ્રિકા રિજન ક્વોલિફાયર દ્વારા T20 વર્લ્ડ કપ 2024 માટે તેમની ટિકિટ બુક કરી લીધી હતી. યુગાન્ડાએ T20 વર્લ્ડ કપ 2024 માટે ક્વોલિફાય કર્યું હોવાથી ઝિમ્બાબ્વેનું સપનું ચકનાચૂર થઈ ગયું છે અને તે આવતા વર્ષે T20 વર્લ્ડ કપમાં ભાગ લઈ શકશે નહીં. ઝિમ્બાબ્વે 2019 વર્લ્ડ કપ અને 2023 વર્લ્ડ કપ માટે ક્વોલિફાય કરી શક્યું નથી, જ્યારે ટી20 વર્લ્ડ કપની વાત કરીએ તો 2022ના ટી20 વર્લ્ડ કપમાં તેનું પ્રદર્શન સારું રહ્યું હતું અને તેણે પાકિસ્તાનને હરાવ્યું હતું.
T20 વર્લ્ડ કપ આફ્રિકા રિજન ક્વોલિફાયરમાં સાત ટીમોએ ભાગ લીધો હતો
ઝિમ્બાબ્વેએ 2022 T20 વર્લ્ડ કપમાં ત્રણ મેચ જીતી હતી, જેમાં પાકિસ્તાન સામે 1 રનથી મળેલી જીતની હજુ પણ વાત કરવામાં આવી રહી છે. ICC મેન્સ T20 વર્લ્ડ કપ આફ્રિકા રિજન ક્વોલિફાયરમાં સાત ટીમોએ ભાગ લીધો હતો, જેમાંથી ટોચની બે ટીમો T20 વર્લ્ડ કપ 2024માં રમશે. યુગાન્ડાએ તેની છમાંથી પાંચ મેચ જીતી અને ટી20 વર્લ્ડ કપ 2024 માટે તેની ટિકિટ બુક કરી છે. યુગાન્ડાની એકમાત્ર હાર નામિબિયા સામે થઈ હતી.
યુગાન્ડાએ ઝિમ્બાબ્વે સામે પાંચ વિકેટે જીત મેળવી હતી
યુગાન્ડાએ ઝિમ્બાબ્વે સામે પાંચ વિકેટે જીત મેળવી હતી. ઝિમ્બાબ્વેની વાત કરીએ તો તેને નામિબિયા અને યુગાન્ડા સામે હારનો સામનો કરવો પડ્યો હતો અને આ તેના માટે સૌથી ભારે સાબિત થયું હતું. નામીબિયા તમામ પાંચ મેચ જીતીને ટી20 વર્લ્ડ કપ 2024 માટે ક્વોલિફાય થઈ ચૂક્યું છે. યુગાન્ડાએ તેની છઠ્ઠી લીગ મેચ જીતીને ટી20 વર્લ્ડ કપ 2024માં પોતાનું સ્થાન નિશ્ચિત કર્યું છે. હવે જો ઝિમ્બાબ્વે કેન્યા સામે જીતશે તો પણ તેને ટી20 વર્લ્ડ કપ 2024માં રમવાની તક નહીં મળે.
