બેદરકારી / ડિગ્રી વગરના ડોક્ટરે ઈંજેક્શન માર્યું અને બાળકનું થયું મોત, સાબરકાંઠામાં લોકોને ચેતવતો બનાવ, પરિવારનો આક્રંદ

• બોગસ ડૉક્ટરના કારણે બાળકનું મોત
• 2 વર્ષના બાળકને આપ્યું હતું ઇન્જેક્શન
• પોશીનાના કોટડા ગઢીની ઘટના

સાબરકાંઠામાં બોગસ અને ડિગ્રી વગરના ડોક્ટરથી કરૂણ બાળકનું મોત થયું છે.  2 વર્ષના બાળકને બોગસ ડોક્ટરે ઇજેક્શન આપતા બાળકની અચાનક તબિયત ખરાબ થઈ હતી અને જેના કારણે તેનુ મોત થયું છે. અત્રે આપને જણાવી દઈએ કે, આ ઘટના પોશીના તાલુકાના કોટડા ગઢીની છે

બોગસ ડૉક્ટર ક્લિનિક છોડી ફરાર
સાબરકાંઠામાં પોશીના તાલુકાના કોટડા ગઢીમાં બોગસ તબીબના કારણે 2 વર્ષની બાળકનું મોત થતાં પરિવારમાં શોકનો માહોલ છવાયો છે. સમગ્ર બાબતને લઈ પરિવારે ડોક્ટરની ડિગ્રી બાબતે પડતાલ કરતા ખુલાસો થયો હતો કે, તેની પાસે કોઈપણ પ્રકારની ડિગ્રી જ નહતી અને તે દવા કરી રહ્યો હતો. જે ઘટનાને પગલે સ્થળ પર પરિવારજનો સહિત લોકોના ટોળા ઉમટ્યા હતા. જેના પગલે ડિગ્રી વગરનો બોગસ ડોક્ટર ક્લીનીક છોડી ફરાર થઈ ગયો હતો. 

પોલીસ તપાસ હાથ ધરી
સમગ્ર મામલે પોલીસને જાણ થતાં પોલીસ કાફલો ઘટનાસ્થળે પહોંચી તપાસ હાથ ધરી હતી. અવાર નવાર બોગસ ડોક્ટરના કિસ્સાઓ સામે આવતા હોય છે અને જેમના કારણે નિર્દોષ માસૂમોના જીવન સાથે ચેડા થતાં હોય છે. પરંતુ આવી ઘટનાઓમાં કડક અને દાખલો રૂપ કાર્યવાહી કરવામાં આવે તો ચોક્કસ આવી ઘટનાઓ અંકુશમાં આવે તેવું લોકો જણાવી રહ્યાં છે.