સ્ટેન્ડબાય / અમદાવાદમાં ટપોરીઓનું આવી બન્યું.! હથિયાર લઈને ફરતા 100થી વધુ અસમાજીક તત્વો ઝબ્બે, પોલીસે ઉપાડ્યું ખાસ અભિયાન

• શાહપુરમાં હથિયાર લઈને ફરતા 100 થી વધુ લોકોને પોલીસે ઝડપ્યા
• પોલીસે છરી, ચપ્પુ, ડંડા સહિતનાં હથિયાર જપ્ત કર્યા
• મોડી રાતે વાહન લઈને નીકળતા લોકોની સઘન પૂછપરછ 

 અમદાવાદ પોલીસ ૧૦૦થી વધુ ટપોરીને હથિયાર લઇને ફરતા ઝડપી પાડ્યા છે.  શહેરમાં બંદૂકની અણીએ લૂંટ, હત્યા, મારામારી, છુરાબાજી જેવી અનેક ઘટના બની રહી છે. તહેવારની તૈયારી વચ્ચે શહેરમાં થતી નાની મોટી ઘટનાને રોકવા માટે પણ સક્ષમ છે. જેને લઇને મોડી રાતે અમદાવાદ પોલીસ ઠેર ઠેર ચેકિંગ કરી રહી છે. કોઇ અસામાજિક તત્ત્વ કે પછી ભાંગફોડિયા તત્ત્વ અમદાવાદમાં ઘૂસે નહીં તેમજ ગુનેગારો કોઇ ઘટનાને અંજામ આપે નહીં તે માટે પોલીસ મોડી રાતે શહેરના રસ્તાઓ પર સ્ટેન્ડબાય થઇ  ગઇ છે.

ઘાતક હથિયાર મળી આવે તો તેમની વિરુદ્ધ ગુનો દાખલ

શહેરમાં ઘાતક હથિયારો સાથે કેટલાંક અસમાજિક તત્ત્વ ફરી રહ્યાં છે. જે ગમે તે સમય પર ગુનાખોરી આચરે તેવી શક્યતા છે. હથિયારો લઇને ફરતા આરોપીઓને પકડવા માટે પોલીસે પેટ્રોલિંગ શરૂ કર્યું છે અને શંકાસ્પદ લાગતા યુવકોને અટકાવીને તેમની તપાસ કરે છે. જો યુવક પાસેથી ઘાતક હથિયાર મળી આવે તો તેમની વિરુદ્ધ ગુનો દાખલ કરે છે. ગઇ કાલે અમરાઇવાડી વિસ્તારમાં છરી લઇને ફરતા વિજય વણજારાની પોલીસે ધરપકડ કરી હતી. આ સિવાય ગોમતીપુરમાં છરી લઇને ફરતા મનીષ ઉર્ફે બબલુ તાંબે, જાવેદઅલી ઉર્ફે કાલિયા અંસારીની ધરપકડ કરી હતી જ્યારે ડંડો લઇને ફરતા મહંમદહુસેન કુત્બુદ્દીન અંસારીની પણ ધરપકડ કરી છે. 

પોલીસે મોડી રાતે ચેકિંગ વધારી દીધું
શહેર પોલીસે અંદાજે ૧૦૦થી વધુ અસામાજિક તત્ત્વ પાસેથી છરી, ચપ્પુ, ડંડા જેવાં હથિયારો જપ્ત કર્યાં છે. થોડા દિવસ પહેલાં શાહપુરમાં યુવકની હત્યા થઇ હતી. જેમાં છરીનો ઉપયોગ થયો હતો જ્યારે એસપી રિંગ રોડ પર પેસેન્જર પર છરી વડે હુમલો કરીને તેને લૂંટી લેવામાં આવ્યો હતો. આ સિવાય દોસ્તી ના રાખવા મામલે યુવકને પોતાના મિત્રએ છરીના ઘા ઝીંકી દીધા હતા. ક્રાઇમની ઘટના દિવસને દિવસે વધી રહી છે. જેને રોકવા માટે પોલીસ નીત નવી મહેનત કરી રહી છે પરંતુ જોઇએ તેવી સફળતા મળતી નથી. આવી સ્થિતિમાં પોલીસે મોડી રાતે ચેકિંગ વધારી દીધું છે. અસામાજિક તત્ત્વ પોતાની પાસે જે હથિયાર રાખે છે તે કોઇ શોખ માટે નહી પરંતુ કોઇના કોઇ ગુનાને અંજામ આપવા માટે રાખે છે. 

હથિયાર રાખવાનો હેતુ શું છે તે પૂછવાની તસદી પોલીસ લેતી નથી 
પોલીસ જ્યારે પણ હથિયાર સાથે કોઇ પણ આરોપીની ધરપકડ કરે છે તો તેને લોકઅપમાં પૂરી દે છે અને બાદમાં આરોપી જામીન લઇને છૂટી જાય છે. આરોપી હથિયાર લઇને કેમ ફરે છે તેની પૂછપરછ કરવાની તસદી પોલીસ લેતી નથી. જો પોલીસ આરોપીની પોતાની આગવી સ્ટાઇલથી પૂછપરછ કરે તો આવનારા દિવસોમાં થતા ઘણા ખરા ગુનાને રોકી શકાય તેમ છે. આ સિવાય પિસ્તોલ તેમજ રિવોલ્વર સહિતનાં હથિયારો પકડવા માટેનું અભિયાન તો ક્રાઇમ બ્રાંચ તેમજ સ્થાનિક પોલીસે હાથ ધર્યું જ છે.