- રાજસ્થાનના CM ગેહલોતનો મોટો દાવો
- કહ્યું-પીએમ મોદી સામે ભાજપમાં થઈ શકે બળવો
- સંસદીય બેઠકનું આપ્યું ઉદાહરણ
રાજસ્થાનના મુખ્યમંત્રી અશોક ગેહલોત અને પીએમ મોદી વચ્ચે સારા સંબંધો છે. બન્ને નેતાઓ અવારનવાર સાથે મંચ શેર કરતા હોય છે, ભૂતકાળમાં ઘણા પ્રસંગોએ બન્ને સાથે સાથે જોવા મળ્યાં હતા. આગામી થોડા સમયમાં રાજસ્થાનમાં વિધાનસભાની ચૂંટણીઓ છે, પીએમ મોદી પણ ત્યાં ચૂંટણીઓ સંબોધી રહ્યાં છે અને આ દરમિયાન સીએમ અશોક ગેહલોતના દાવાથી રાજકીય ભૂકંપ મચ્યો છે.
શું બોલ્યાં અશોક ગેહલોત
અશોક ગેહલોતે કહ્યું કે ભારતીય જનતા પાર્ટીમાં વડાપ્રધાન સામે બળવો થઇ શકે છે. કારણ કે પક્ષમાં તેમનું માન ઘટ્યું છે. જો કે તેમણે આ વાત કયા આધારે કહી તે અંગે સ્પષ્ટતા કરી નથી. સીએમ ગેહલોતે વધુમાં કહ્યું કે, ભાજપના કોઈ પણ મોટા નેતાને પૂછો કે તેમની પાર્ટીની બેઠકોમાં કેવા પ્રકારની સ્થિતિ ઉભી થઈ છે. આ પહેલા તેમની પાર્ટીની સંસદીય દળની બેઠકમાં શું સ્થિતિ હતી? હવે કેવા પ્રકારની સ્થિતિનું નિર્માણ થયું છે? તમે લોકો શોધી કાઢો, તમને સત્ય ખબર પડશે. મોદીજી સાથે પહેલા અને અત્યારે કેવા પ્રકારની સ્થિતિ બદલાઈ ગઈ છે?
ઓબીસી સમુદાયમાંથી વડા પ્રધાન પદ સુધી પહોંચ્યાં
ગેહલોતે કહ્યું કે હું વડા પ્રધાન નરેન્દ્ર મોદીને પણ સમજાવવા માંગું છું. તમે ઓબીસી સમુદાયમાંથી વડા પ્રધાન પદ સુધી આવ્યા છો. ઓછામાં ઓછું ઓબીસીનું સન્માન તો રાખો. પરંતુ તેઓ આવું જ વિચારે છે. ત્યાર બાદ હવે તેમની પાર્ટી પણ તેમની વિરુદ્ધ થઇ ગઇ છે. તમારી સામે ધીરે ધીરે બળવો થઈ શકે છે.
દેશ એકજૂટ રહે તેવી જ અમારી ઈચ્છા
ગેહલોતે કહ્યું કે અમે સાંભળીએ છીએ કે આરએસએસ અને તેમની વચ્ચે કોઈ અંતર વધ્યું છે અને તેમની વચ્ચે પહેલા જેવો સંબંધ રહ્યો નથી પરંતુ અમારે આ વાત સાથે કંઈ લેવાદેવા નથી, અમે માત્ર એટલું જ ઇચ્છીએ છીએ કે ભારત એકજૂટ રહે. તેના માટે સમગ્ર દેશવાસીઓએ કોઇ પણ પક્ષ કે વિચારધારાના હોવા જોઇએ. દેશ અને ભારત માતાના પ્રેમ માટે સૌએ એકજૂટ રહેવું જોઈએ.
