આગાહી / ખેડૂતો માટે રાહતના સમાચાર: ગુજરાતમાં હવે ઊંચકાશે ગરમીનો પારો, તાપમાન જશે 40 ડિગ્રીને પાર

• અમદાવાદ વાસીઓ ગરમી માટે રહેજો તૈયાર 
• ગરમીને લઈને હવામાન વિભાગની આગાહી
• રાજ્યમાં આગામી 5 દિવસ સૂકું વાતાવરણ રહેશે

દેશના અનેક રાજ્યમાં હીટવેવનો કહેર યથાવત છે. દેશના વિવિધ ભાગોમાં તાપમાનનો પારો પણ 40 ડિગ્રી સેલ્સિયસને પાર કરી ગયો છે. રાજસ્થાન, ઝારખંડ, ઓડિશા અને બિહાર જેવા કેટલાય રાજ્ય ગંભીર હીટવેવની ઝપેટમાં છે અને હવામાન વિભાગે તીવ્ર ગરમી-હીટવેવની ચેતવણી આપી છે. ગુજરાતના વાતાવરણમાં પણ સતત પલટો આવી રહ્યો છે. ગરમીમાં પણ અચાનક વાદળછાયું વાતાવરણ થઇ જાય છે. તો ક્યારેક કાળઝાળ ગરમી પડે છે. ત્યારે હવામાન વિભાગે ગરમીને લઈને આગાહી કરી છે. 

આગામી 5 દિવસ સૂકું રહેશે વાતાવરણ
હવામાન વિભાગના જણાવ્યા અનુસાર, રાજ્યમાં આગામી 5 દિવસ સૂકું વાતાવરણ રહશે. બે દિવસ સુધી તાપમાનમાં કોઈ ફેરફાર થશે નહીં. બે દિવસ બાદ 1 ડિગ્રી તાપમાનનો વધારો થશે. મોટા ભાગના શહેરોમાં તાપમાન 40 ડિગ્રીને પાર થવાની શક્યતાઓ છે. ઉત્તરી દિશાથી સૂકા પવન ફૂંકાવવાના કારણે તાપમાનમાં વધારો થશે. 

હાલ યલો એલર્ટની કોઈ આગાહી નહીંઃ મનોરમા મોહંતી
આ અંગે માહિતી આપતા હવામાન વિભાગના ડાયરેક્ટર મનોરમા મોહંતીએ જણાવ્યું છે કે, આજથી બે દિવસ સૌરાષ્ટ્રમાં તાપમાન વધવાની શક્યતાઓ છે. સુરેન્દ્રનગર, રાજકોટ, અમરેલીમાં 1 ડિગ્રી તાપમાન વધવાની શક્યતાઓ છે. જોકે, હાલ યલો એલર્ટની કોઈ આગાહી નથી. 

આજે ક્યાં કેટલું તાપમાન નોંધાયું?
હવામાન વિભાગના જણાવ્યા અનુસાર, આ વખતે અમદાવાદમાં પણ કાળઝાળ ગરમી પડશે. આજે અમદાવાદમાં 41 ડિગ્રી તાપમાન નોંધાયું છે. જ્યારે  સુરતમાં 40 ડિગ્રી, વડોદરામાં 41 ડિગ્રી, રાજકોટમાં 41 ડિગ્રી, ઈડરમાં 41 ડિગ્રી, સુરેન્દ્રનગરમાં 41 ડિગ્રી, ભુજમાં 40 ડિગ્રી, પાટણમાં 41, ડીસામાં 39 ડિગ્રી , બોટાદમાં 42 ડિગ્રી, ભાવનગરમાં 41 ડિગ્રી તાપમાન
ભરૂચમાં 41 ડિગ્રી અને ખેડામાં 40 ડિગ્રી તાપમાન નોંધાયું છે.