એન્ફોર્સમેન્ટ ડિરેક્ટોરેટ (ED)ને મોટી સફળતા મળી છે. EDને વિશ્વસનીય માહિતી મળી હતી કે કેટલીક સંસ્થાઓ મોટા પાયે ભારતની બહાર વિદેશી ચલણ મોકલવામાં સામેલ છે. જેના આધારે વિભાગની ટીમે કેટલીક કંપનીઓ પર દરોડા પાડીને મામલાની તપાસ શરૂ કરી હતી. સર્ચ દરમિયાન 2.54 કરોડ રૂપિયા જપ્ત કરવામાં આવ્યા છે, જેમાંથી કુલ રકમનો મોટો ભાગ વોશિંગ મશીનમાં છુપાવવામાં આવ્યો હતો.
આ દરોડા દિલ્હી, હૈદરાબાદ, મુંબઈ, કુરુક્ષેત્ર અને કોલકાતામાં પાડવામાં આવ્યા હતા. ED ટીમે FEMA, 1999 ની જોગવાઈઓ હેઠળ મેસર્સ કેપ્રિકોર્ન શિપિંગ એન્ડ લોજિસ્ટિક્સ પ્રાઈવેટ લિમિટેડ અને તેના ડિરેક્ટર્સ વિજય કુમાર શુક્લા અને સંજય ગોસ્વામીની શોધખોળ હાથ ધરી હતી. આ સાથે તેમની સંબંધિત સંસ્થાઓ મેસર્સ લક્ષ્મીટોન મેરીટાઇમ, મેસર્સ હિન્દુસ્તાન ઈન્ટરનેશનલ, મે. રાજનંદિની મેટલ્સ લિમિટેડ, મેસર્સ સ્ટુઅર્ટ એલોય્સ ઈન્ડિયા પ્રાઈવેટ લિમિટેડ, મેસર્સ ભાગ્યનગર લિમિટેડ, મેસર્સ વિનાયક સ્ટીલ્સ લિમિટેડ, મેસર્સ વશિષ્ઠ કન્સ્ટ્રક્શન પ્રાઈવેટ લિમિટેડ અને તેમના ડિરેક્ટર-પાર્ટનર્સ સંદીપ ગર્ગ, વિનોદ કેડિયા પર સર્ચ હાથ ધરવામાં આવ્યું હતું.
1800 કરોડની શંકાસ્પદ રકમ સિંગાપુર મોકલવામાં આવી
EDને તેની તપાસમાં જાણવા મળ્યું છે કે 1800 કરોડ રૂપિયાની શંકાસ્પદ રકમ મેસર્સ ગેલેક્સી શિપિંગ એન્ડ લોજિસ્ટિક્સ પ્રાઈવેટ લિમિટેડ અને હોરિઝોન શિપિંગ એન્ડ લોજિસ્ટિક્સ પ્રાઈવેટ લિમિટેડ સિંગાપુરને મોકલવામાં આવી હતી. આ બંને વિદેશી સંસ્થાઓનું સંચાલન એન્થોની ડી સિલ્વા દ્વારા કરવામાં આવે છે.
નકલી આયાત અને નૂર પરિવહનની આડમાં વ્યવહારો
તપાસ દરમિયાન એવું જાણવા મળ્યું હતું કે મેસર્સ કેપ્રિકોર્ન શિપિંગ એન્ડ લોજિસ્ટિક્સ પ્રાઇવેટ લિમિટેડ, મેસર્સ લક્ષ્મીટોન મેરીટાઇમ અને તેમના સહયોગીઓએ નકલી નૂર સેવાઓ અને આયાતની આડમાં સિંગાપોર સ્થિત સંસ્થાઓને રૂ. 1,800 કરોડ મોકલ્યા હતા. આ માટે, મેસર્સ નેહા મેટલ્સ, મેસર્સ અમિત સ્ટીલ ટ્રેડર્સ, મેસર્સ ટ્રિપલ એમ મેટલ એન્ડ એલોય્સ, મેસર્સ એચએમએસ મેટલ્સ વગેરે જેવી નકલી એકમોની મદદથી જટિલ વ્યવહારો દર્શાવવામાં આવ્યા હતા.
વધુ વાંચો : 'પરાયા પુરુષ સાથે સંબંધ બનાવવો ગુનો નહીં', જાણો હાઈકોર્ટે કેમ ન ગણ્યો અપરાધ?
દસ્તાવેજો અને ડિજિટલ ઉપકરણો પણ જપ્ત કરવામાં આવ્યા હતા
સર્ચ દરમિયાન 2.54 કરોડ રૂપિયા મળી આવ્યા હતા, જેના વિશે આરોપી કોઈ જવાબ આપી શક્યા ન હતા. આ રકમનો એક ભાગ વોશિંગ મશીનમાં છુપાવવામાં આવ્યો હતો, જેને જપ્ત કરવામાં આવ્યો છે. આ ઉપરાંત, સર્ચ કાર્યવાહી દરમિયાન, વિવિધ ગુનાહિત દસ્તાવેજો અને ડિજિટલ ઉપકરણો પણ મળી આવ્યા હતા, જેને જપ્ત કરવામાં આવ્યા છે. EDની ટીમે આ સાથે સંકળાયેલી સંસ્થાઓના 47 બેંક ખાતા પણ ફ્રીઝ કરી દીધા છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
